開始之前，盈盈溫馨提提大家，以下內容涉及重大劇透，未睇《復仇者聯盟３》就最好睇咗先喇。
　　話說《復仇者》嘅大反派Ｔｈａｎｏｓ（魁隆），消滅人類嘅理念係沿自想得到整個宇宙嘅平衡，喺電影嘅最後仲只用一吓「響指」，就隨機消滅咗宇宙一半生命。雖然好多粉絲，都為被消滅嘅英雄嘅死而痛心疾首，不過原來都有唔少人認同佢嘅理念，喺外國討論區Ｒｅｄｄｉｔ上面，仲有人開咗個子討論區叫做「Ｔｈａｎｏｓ無做錯事（ｔｈａｎｏｓ　ｄｉｄ　ｎｏｔｈｉｎｇ　ｗｒｏｎｇ）」。
　　更加有趣嘅係，用戶「Ｔｈｅ　Ｊｅｄｉ　Ａｐｐｒｅｎｔｉｃｅ」效法Ｔｈａｎｏｓ發起咗個行動，話為咗保護討論區嘅平衡，要將子討論區嘅用戶，隨機揀出一半嚟「封鎖」！估唔到引起廣泛迴響，連《復仇者》導演羅素兄弟（Ｒｕｓｓｏ　Ｂｒｏｔｈｅｒｓ）都加入埋一齊玩，而今次嘅行動亦都得到Ｒｅｄｄｉｔ嘅技術支援。
　　佢哋喺今朝終於完成咗依個「消滅一半用戶」嘅壯舉喇！負責發起行動嘅用戶就扮足
Ｔｈａｎｏｓ嘅語氣，開ｐｏｓｔ話：「已經完成咗封鎖行動，呢個子討論區依家得到完美嘅平衡，相信我哋嘅救世主Ｔｈａｎｏｓ一定會好驕傲。」睇嚟入戲都真係幾深。
　　計盈盈話，成個行動最開心嘅一定係《復仇者》嘅發行商迪士尼喇，估唔到套戲落咗畫幾個月，都可以引起咁大迴響，套戲熱爆全球，話唔定繼《Ｆｏｒｚｅｎ》之後，迪士尼又可以靠《復仇者》再成功吸金帶挈業績吧！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

【etnet 30周年】多重慶祝活動一浪接一浪，好禮連環賞！ ► 即睇詳情