祖國魚缸今日（９日）終於復市，大部分時間都升逾１巴仙，表現算中規中矩。但香江呢邊亦係一般，皆因之前升得太多嘅神州磚頭佬有比較大嘅回吐，好彩股王ＱＱ
（００７００）都算硬淨，相信仍然可以成為魚缸主要動力。
　　查實ＱＱ真係唔睇得少，從基本面睇，公司手遊收入強勁，而且又不乏新嘅盈利增長點，好似公司嘅大數據呀、支付業務，都可以成為新嘅增長焦點，換言之公司仲有潛在增長空間，股價自然有望高高高喇！
　　此外，公司上星期五（６日）收市後宣布分拆閱文集團上市，１０月１７日收市前持有ＱＱ嘅股東可以獲得優先發售中嘅保證配額。講起閱文，過往三年業績，頭兩年都蝕錢，係最近一年先至錄得３０３６萬人仔嘅盈利。好在閱文近三年嘅收入卻係節節上升，上年收入就增長咗近六成，錄得近２６億銀人仔。但係閱文距離大規模持續獲利嘅階段仲有一段日子，因為閱文上年嘅成本都相應增加咗近五成，成本控制方面有待改善。
　　ＱＱ今次分拆收入未穩定嘅閱文出嚟，令自己本身嘅手遊、廣告同支付等網絡業務嘅價值可以得到獨立評估，ＱＱ估值有望變得更好。隨著分拆日子愈來愈近，現價實在係收集ＱＱ作長線投資嘅好時機！
　　
　　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】房租管實施兩年半，工作小組調查發現97.3%租戶未裝獨立水電錶，業主濫收水電費。您認為現行罰則是否過輕？► 立即投票