中汽協每個月會公布新能源車嘅銷售情況，最近就有今年頭4個月嘅數據。今年1-4月，內地新能源汽車銷量排名前十位嘅企業集團銷量合計188.7萬架，按年增長58.6%，佔新能源汽車銷售總量嘅84.9%，並且高過舊年同期8.4個百分點。
　　至於整體汽車銷售方面，今年1-4月汽車銷量排名前十位嘅企業集團銷量合計684.6萬輛，按年增長3.8%，佔汽車銷售總量嘅83.1%，低過上年同期2.6個百分點。當中，無論係新能源車定整體汽車銷量，比亞迪(01211)表現都好好，集團新能源車銷量繼續喺高基數上維持高增長，而汽車銷量對比上年同期，亦兩位數嘅明顯增長。
　　早前比亞迪據報想加大自動駕駛領域投入，包括成立新嘅自動駕駛研發部門、加大招聘力度等。報道引述集團執行副總裁李柯5月初一場投資峰會上提到，公司已經為自動駕駛招聘咗4000至5000名軟件人員。報道又引述3位消息人士透露，比亞迪舊年底喺上海成立產品規劃同汽車新技術研究院分院，並且設置智能駕駛開發部，開發高階自動駕駛技術。
　　比亞迪銷量持續增長，甚至有意開拓自動駕駛業務。即使股神仲未減持晒啲股份，但係比亞迪股價自3月中旬開始反覆上升，4月中旬開始幾次喺20天線出現支持，走勢好咗好多。今日股價曾經升超過3%，已經升穿保力加通道，挑戰年內高位268銀嘅機會幾大，有貨嘅朋友可以繼續揸住。至於未有貨嘅朋友，可以等股價落番20天線(依家喺238銀左右)先吸納，會比較值博。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】機管局獎勵航空公司增往來香港航線，措施能有效推動航空業復常？► 立即投票