神州疫情反反覆覆，一時上海見曙光，一時又輪到北京開始封，最新官方公布的PMI已經反映緊封城帶來的影響，中國4月製造業PMI為47.4%，比3月跌咗2.1個百分點，低過市場預期，仲創超過兩年新低。疫情時好時壞，搞到好多炒緊經濟復甦嘅內需股都尷尷尬尬咁，猶如一條雞肋。不過換個角度睇，雖然內需股都仲未享受到經濟復甦嘅滋味，但未有唔代表唔會有，趁低撈定貨等佢爆上都係一種部署。
　　餐飲股嚟講都以九毛九(09922)個價最硬淨，比起海底撈(06862)逆市擴張策略失敗告終，九毛九就真正係處於健康擴張階段，舊年全年賺多1.74倍至3.4億人仔，旗下主要都係靠太二酸菜魚撐起成份業績，太二舊年收入有成32.85億人仔，佔總收入超過78%，按年增加超過67%，翻枱率仲係九毛九旗下最高，去到3.4次，足證九毛九疫市下都維持到收入增長。
　　走勢嚟睇九毛九而家都係行緊range，有上有落總好過有落無上，建議range底14銀買得過，睇短期破17銀可以放，睇長鍾意揸住博復甦又得，最上望到20銀先啦。
　
　　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票