魚缸早段承接到噚日(16日)嘅升勢，嚟緊兩萬五呢關非常關鍵呀，睇下可唔可以升穿喇。今日博客同大家睇下平保(02318)。
　　平保今日公布咗，1月原保險合同保費收入約1364.86億銀人仔，按年升約1.21%。另外，1月中國平安人壽保險保費收入約986億元，按年跌少少約0.6%，中國平安財產保險保費收入約328億元，按年就升約8.2%。
　　另外，博客留意到德勤出咗最新嘅《2022年保險行業展望》報告，講到約三分之一受訪者預計今年收入將「顯著增加」，預料全球保險業今年增長會快咗。
　　平保股價早段雖然跌緊，但係從資金流嚟講，今日整體主動買沽比率有59:41，當中大戶主動買沽比率更加去到62:38，5日平均大戶主動買沽比率亦有57:43，連續10日錄得資金流入，5日平均資金淨流入額都有3.175億，反映大戶對平保都有啲信心。
　　睇埋公仔圖，股價喺今年1月7號大升5.34%，之後走勢都逐步向好，更加出現兩次上升旗形。上個星期五(11日)曾經衝到上高位69.4銀，跟住有些少回吐，但整體嚟講都係反覆向好。目前股價依然企穩10天線之上，而10天線仲未有下行跡象，博客認為平保短期喺63銀到69銀之間上落，如果突破上一個高位69.4銀，可以將目標睇高少少到77銀，跌穿60銀先止蝕離場。

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

《說說心理話》【怪獸家長必學】點樣幫仔女溫書不傷感情？培養上進心唔係靠鬧？子女一旦失控教你點應對！► 即睇