就快又到9月，孖屐都準備緊迎接新一年嘅蘋果秋季發布會，而今次其中一個焦點就係Mac mini。
　　今日孖屐盛傳蘋果將會推出新版Mac mini，新機將會係Mac mini史上體積最細，更加會係蘋果史上最細。目前Mac mini大小都固定係19.7cm x 19.7cm x 3.58cm，咁多年都同Steve Jobs 2010年在生時一樣，一用就係十幾年。據講今次Mac mini係因為晶片升級變細咗，令到體積都可以縮細。
　　有爆料就話，Mac mini今次將會縮細到好似Apple TV機頂盒咁大，面積上都接近細咗一半，當中就係因為用咗最新嘅M4晶片，仲有一款係用咗仲未發布嘅全新M4 Pro晶片。價錢方面，目前Mac mini入門價係599美金，預計新版細機有可能成本更低，但就唔肯定係咪真係會減價。
　　睇返數據，由上年起Mac系列嘅銷售都較為疲弱，孖屐估計今次出新機，就係為咗刺激一吓Mac嘅銷售。據講由新Mac mini開始，未來一年蘋果全系電腦系列都會配備M4晶片，其中Mac mini、iMac一體機和MacBook Pro都將會喺今年發布，寄望可以帶起返Mac嘅銷售。
　　除咗蘋果之外，今日國產代表都有風吹。華為常務董事余承東被發現到用緊一款三摺手機，即係一部機可以摺兩次，打開就好似屏風咁。如果真係出品，就會係全球第一款上市嘅三摺手機。隨後個風就愈吹愈猛，好多個手機KOL都跟手發布有可能就係華為新三摺機嘅相，疑似配有手寫筆，好有可能今年內就會量產，並會喺10月發布。
　　蘋果9月出，華為就疑似打算10月發布三摺機，疑似係有追住嚟打嘅感覺。比起變細咗，摺mon摺多次都好次矚目一啲，話唔定真係可以搶fo！請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【與拍賣官看藝術】常玉作品屢創天價，背後其實藏著跌宕起伏的人生► 即睇