近期Bitcoin又熱炒返，前日(9日)傳美國證交會(SEC)準備批准Bitcoin現貨ETF上市，時隔一日就忽然話係假消息，搞到堆概念股炒一日之後又倒跌。到今日就收到SEC真係通過咗11隻現貨ETF上市，結果堆概念股又升返。雖然SEC覺得Bitcoin太波動，不過呢幾日嘅消息管控令到傳統股票市場都堪比Bitcoin咁波動。
　　美國時間10日SEC宣布，批准比特幣現貨ETF上市，唔同以往係期貨ETF，今次係第一次批准現貨ETF上市，11隻ETF來自唔同投資機構，包括貝萊德、富達、景順、方舟等等，投資者可以透過傳統證券交易所買入現貨ETF，接近等同直接買入比特幣，可以話係第一次喺傳統金融市場買賣比特幣。
　　不過SEC主席Gensler就喺聲明入面講到，因為之前拒絕Grayscale嘅現貨比特幣ETF申請喺法庭上被判敗訴，所以先無得唔批。Gensler又強調，比特幣投機性高兼波動性強，亦會被用於非法活動，包括勒索、洗黑錢同恐怖主義融資等等，警告投資者一定要謹慎投資。
　　確實，美國身為全球最大金融市場，道德上同法律上都有責任為全球金融市場把關。SEC因為敗訴而不得不批准現貨比特幣ETF上市，令原本只可以經區塊鏈交易嘅比特幣，以另一種形式進入傳統金融市場，可以話係歷史性嘅一刻。SEC身為監管機構，有維持金融市場穩定嘅責任，面對咁「曳」嘅比特幣，自然係唔想佢入到傳統金融市場嚟破壞穩定性，但無奈美國係自由市場，法律都已經判咗佢敗訴，自然就成為咗SEC嘅「不可抗力」，亦都無得再「阻住地球轉」。
　　美國都已經批准現貨比特幣ETF上市，香港呢據講都準備好批准現貨ETF上市。目前魚缸已經有兩隻比特幣期貨ETF，如果真係批埋現貨ETF，就會係亞洲區第一個批准現貨ETF交易嘅金融市場。雖然美國證交話比特幣波動兼有犯法嫌疑，不過站喺香港立場，可以為魚缸加到水就「願加盡加」。如果仲成為亞洲區內第一個可以交易比特幣現貨ETF市場，一定有利吸引唔同資金進場，加大流動性，絕對係正中下懷，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

夏日中暑高風險！即睇中暑迷思＋預防措施！► 立即了解