東方甄選(01797)「小作文」事件因為行政總裁孫東旭「下台」而終於告一段落，「丈母娘」嘅脫粉起義成功幫董宇輝爭取更優厚嘅待遇，噚晚就由俞老闆親自同新任「集團高級合夥人」董宇輝同框開播。
　　被祭旗嘅孫東旭被架空去做非執行董事，因禍得福嘅董宇輝就滿面春風。噚晚董宇輝提到，呢段期間自己都收到好多「天價offer」，不過自己同「俞老師」坦誠相待，所有消息都係互通，之前買樓嗰陣俞敏洪都有份借錢，所以一切對佢來講都係份恩情。
　　董宇輝今次成為東方甄選嘅「一人之下」，除咗可能因為佢本身性格老實，東方甄選出手都唔手軟，先來就有三個新title，除咗「東方甄選高級合夥人」之外，仲有「新東方教育科技集團董事長文化助理」同「新東方文旅集團副總裁」。俞老闆解釋，「高級合夥人」係有話語權嘅，相當於「VP」，甚至係有股東嘅身份色彩，即係已經分咗股份畀呢位開國功臣。除此之外，東方甄選未來一個月內仲會為董宇輝成立獨立直播間同埋個人工作室，之後將會全權交由佢自己營運，俞老闆仲講明就算董宇輝離巢，個帳號都會歸佢，「不會讓宇輝出去的時候一無所有」。
　　對於東方甄選呢一系列offer，董宇輝就回應話已經「遠超過應得的」，自己都係誠惶誠恐，亦都提到呢段期間「好多人嘅表達過程令俞老師承受很多壓力」。但係新嘅董宇輝獨立直播間，未來將會有更多獨立性，亦會更加強調文化題材，會同俞敏洪一齊推廣書籍、做作家訪談、文旅推廣以至係農產品等等。
　　而喺兩岸位直播期間，東方甄選抖音號嘅粉絲數目一次過勁升返200幾300萬，一次補返之前流失嗰班人，總數已經升返上3100萬以上，反映如今嘅處理先係網民所認同。喺網絡世界，同網民主流意見背道而馳就注定行路難，孫東旭由撻電話嗰吓已經輸在起跑線上，請請！
　
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》【怪獸家長必學】點樣幫仔女溫書不傷感情？培養上進心唔係靠鬧？子女一旦失控教你點應對！► 即睇