中央經濟工作會議早兩日舉行完畢，記得上年經濟工作會議前一個月已經有大把傳聞，引到孖屐個個都擔定凳仔等睇戲。不過今年到開完會都唔算好矚目，可能真係好消息唔多，事前都無乜風放出來，結果都係無乜特別。
　　不過會上就提到，要「嚴控一般性支出，黨政機關要習慣過緊日子」。地方政府近幾年都被認為「繃繃緊」，所以之前先會出現地方村鎮銀行擠提情況，所以阿爺都要求地方政府慳住使，今次都講明慳得就慳。
　　唔知碧桂園(02007)係咪提早收到風，「繃緊」到邊緣之時都率先開始「過緊日子」。今日碧桂園就公布，執董兼主席楊惠妍、執董兼總裁莫斌、執董楊子莹同非執董陳翀主動提出降低薪酬請求，其中莫斌同楊子莹薪酬降幅更加分別高達九成六同九成四。減人工不特止，碧桂園仲話目前已經取消所有高管配車，集團旗下所有車賣得就賣，又取消埋高管體檢報銷、高管免費食堂等等待遇。
　　碧桂園使出「慳錢奧義」，當然都係為咗用來還債。碧桂園話會盡最大努力，按歸零原則削減行政費用開支，非必要不支出，勢要將2023年開支縮減到2021年嘅60%。慳錢都係有結果嘅，今日路透就報道，碧桂園10億人仔嘅境內公司債今日派息，成功避免違約。
　　減人工嘅除咗莫斌之外，另外三位都係楊家人，咁嘅環境率先自減人工當然都係應份。不過比起恒大(03333)，碧桂園喺解決債務上都積極得多，周不時都會見到碧桂園有消息話慳咗幾多幾多，就算係面嗰浸都肯做過恒大。而且有度好就係碧桂園無出現「技術性離婚」嘅套路，雖然之前有出現過楊惠妍捐兩成碧服(06098)股份畀國強公益基金會嘅「可疑行為」，不過基金會係香港成立，比起「前許太」已經疑似走佬，碧桂園就「乖」得多，點都未至於到目前恒大嘅境況，請請！
　
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇】拜登宣布競逐連任，若民主黨讓賀錦麗代替參選會否有效爭取選票？► 立即投票