JPEX風波越吹越勁！證監近期主力規管有關Crypto發牌，繼之前不點名警告未持牌嘅Crypto交易所唔好自稱有牌，上個禮拜再開名指JPEX未有喺香港攞到牌，但又自稱持牌，而且經營手法好有問題，要求JPEX停止推廣同其有關嘅服務同產品。
　　JPEX一年多啲係香港大力宣傳，一開頭大型banner掛到周街都係，尤其喺旺角，大大幅喺西洋菜南街一抬頭就見到。雖然自稱係「日本加密貨幣交易所」，以為有個「J」字就係日本，但實質同日本一啲關係都無，日本交易所集團(JPX)更加曾經澄清同JPE並唔係合作夥伴。
　　經歷完一輪banner「硬攻」之後，JPX宣傳招數轉為「軟功」，轉搵咗一堆KOL來喺YouTube、Facebook等等渠道宣傳買賣Crypto。不過今次同JPEX有關嘅KOL都係通常被認為係「藍絲」嘅KOL，其中莊思敏呢兩日受訪就提到，自己都係今次事件嘅受害者，總共蝕咗「六位數中」。
　　而咁多人之中，都係係林作最為高調。今年6月，鑽石山發生斬人案，仲係保險經紀嘅林作貫徹抽水本色，喺呢單悲劇入面用死者來開玩笑，再次被網民群起圍插，起初仲大叫「世界無咩唔可以用來笑」，不過後尾連公司都頂唔順，宣布要同佢解約。被炒之後林作就轉戰幣圈，開始拍片講炒幣，7月就好高調咁話畀人聽佢係「JPEX合伙人」，仲不時話自己賺咗幾多錢咁。
　　上個星期三證監出招之後，林作就表明之後唔會再推廣及提及任何香港未有申請牌照的交易所。到上星期五，林作親自去到灣仔警總向警方提供線索，不過當時都未有拉佢。到今日，警方先敲鑼打鼓去到林作屋企正式拘捕佢，仲有一大棚記者到場見證住佢被扣押落樓，同時間仲有另一位同JPEX有關嘅「藍絲」KOL陳怡被捕，至於莊思敏就人唔喺香港，向記者表示無回應。
　　原本只係B1版頭條，牽涉到一班KOL後即時變成C1頭條。不過林作都係慘啲，自己行入差館無人拉，返咗屋企先被人押住走，都夠曬警世。又睇返JPEX，由於本身係喺澳洲註冊，疑似喺香港並無實際負責人，所以事發幾日先拉咗林作同陳怡呢兩個陣前卒，睇來JPEX都係早有準備，請請！
　
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

夏日中暑高風險！即睇中暑迷思＋預防措施！► 立即了解