敘福樓集團(01978)尋日公布截至6月30日止中期業績，期間盈利4760萬元，比舊年同期大增6倍，當然係因為低基數啦，每股盈利5.94仙，派中期股息4.75仙，再加派特別股息每股12.5仙，總共17.25仙。
　　心水清嘅會發現，以發行股數8億股計，即係要派1.38億銀出街，但係佢嘅盈利唔夠5000萬，點派？根據年報，控股公司「叙福樓控股」（LHG Holdings）持有敘福樓集團75%股份，而主席兼行政總裁黃傑龍就係以「叙福樓控股」間接持有上巿公司75%股權嘅大股東之一，所以實際派出街係3450萬銀，派完仲有剩。就算控股公司嘅股東要draw水，集團有短期銀行存款2億幾銀，同埋現金同現金等價物億幾銀，總額3.6億銀，夠應付有餘。
　　當然，投資者只係關注敘福樓現價買唔買得過啦。如果以現價1.24銀計，總共收17.25仙，即係息率有成14厘，絕對係高息之選。敘福樓喺2018年5月30日上市，當日嘅高位1.977銀仍然係上市以來最高，2020年3月19日跌到0.32銀嘅上市新低，反彈跌幅50%，即係1.1485銀，2021年4月16日最高升到1.38銀，之後又跌番，舊年3月16日低見0.73銀，1.05至1.10銀差唔多係過去兩年嘅橫行區頂，以現價1.24銀計，除淨後股價係1.0675銀，即係返番去前橫行區頂高少少位置。
　　不過，經營成本明顯上升，物業租金及相關開支達到3955萬銀，比舊年同期大增近69%。投資者要考慮嘅係，過去幾年有政府派發消費劵，加上對企業進行補貼，以後仲有冇未知，食客係咪仲係咁多，未來係咪仲有咁高息派？依家特區政府又話要搞活個夜市，會唔會頂爛市㗎？14厘息確係吸引，但依家面對高息環境，飲食業唔易做，敘福樓6.6億銀收入，但食材同員工開支都超過4億銀，1.0675銀係咪強支持？打個折，若到一蚊先諗啦！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇】拜登宣布競逐連任，若民主黨讓賀錦麗代替參選會否有效爭取選票？► 立即投票