許家印同老婆「技術性離婚」嘅猜測，謎底已解開？
　　事源恒大(03333)喺8月14日晚發出多個公告，公告中許家印老婆丁玉梅被定義為「獨立於本公司及其關聯人士的第三方」，同之前一直稱丁玉梅為「許太太」唔同，所以坊間猜測佢兩個已經離婚，而為咩要離婚，梗係為免一旦恒大破產渣都無啦。
　　根據相關公告，依家作為「獨立於恒大及其關聯人士的第三方」嘅丁玉梅，將會認購約4.17億股恒大汽車(00708)股票，而佢全資擁有嘅好邦有限公司就會認購約1.56億股，兩者加埋約有5.73億股恒大汽車。以尋日收市價1.5港銀計，其持有嘅股權市值約8.6億港銀。不過，法律界人士稱，根據中國法律，即便離婚，婚內產生的共同債務依然需要共同償還，離婚無法達到將個人債務同夫妻共同債務隔離嘅目的！
　　呢頭市場仲估緊係咩一回事，嗰頭恒大就向美國紐約曼哈頓破產法院申請破產保護，以尋求免受債權人向美國發起訴訟，以及扣押恒大喺美國嘅資產，恒大旗下公司景程同樣申請破產保護。
　　根據《破產法》第15章，可令非美國企業，暫停美國境內針對公司嘅訴訟程序，令企業有喘息機會及完成重組，以及同債權人就賠償方案達成和解。透過第15章進行備案，是國際債務重組落實交易的其中一個過程。
　　中國恒大8月16日晚發公告，指因旗下恒大汽車獲紐頓集團(NWTN)入股，為令恒大協議安排下的債權人，有時間考慮擬議認購及其對恒大協議安排債權人嘅影響，公司決定延期並重新召開恒大協議安排會議，亦同時延期並重新召開景程協議安排會議同埋天基協議安排會議，以便同延期並重新召開恒大協議安排會議嘅時間安排保持一致。
　　不論點都好，恒大呢個負債2.44萬億人仔，大到不能倒嘅集團睇怕都冇運行，加上依家內地經濟表現疲弱，阿爺想出手相助都好多考慮，恒大都好難「恒大」喇！請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇】機管局獎勵航空公司增往來香港航線，措施能有效推動航空業復常？► 立即投票