上回就講到東方甄選(01797)因為有播主「唔小心」喺抖音直播嗰陣，show到個code，被抖音評定為故意引流而罰停播3日。被罰後東方甄選把心一橫，直接喺自家app做85折大減價，上個禮拜五就公布成功締造3000萬人仔嘅單日銷售額。
　　原定就罰停播到去7月29號，不過到今日為止，東方甄選都未正式喺抖音復播。對於被罰停播，CEO孫東旭之前就答，係佢哋自己觸犯規則，會積極整改，而且「過去、現在和未來，都會和平台好好合作發展，我們跟平台一直溝通順暢」。不過呢句之後，就一直都未有復播嘅下文。
　　不過就喺噚日，東方甄選公布，7月29號單日銷售額更加去到3500萬銀，4日促銷夾埋有成1.1億銀人仔銷售額。所以，東方甄選就索性將促銷延長到今日先完。不過就一直無講幾時會正式復播。
　　都好難怪東方甄選會寧願繼續停播，反正自己做緊減價反應咁好，呢個時候返抖音開播反而係自己搶自已生意，到時分流咗自營app嘅流量就仲弊。加上正係月尾，索性繼續自營app優先，谷高條數一來可以做靚7月盤數，二來就係可以測試自營app嘅最大潛力。
　　開得自營app，最大目標當然就係唔想寄人籬下，既然有個咁好嘅機會，點解唔試吓？東方甄選播咗咁耐，無理由唔知唔可以show到code，當然都無證據證明佢係故意「唔小心」，不過真係一個難得嘅好機會，梗係要試盡先。做靚自營app流量，第時要傾廣告都好傾啲，睇來東方甄選要脫離抖音都唔係完全無可能，請請！
　
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》【怪獸家長必學】點樣幫仔女溫書不傷感情？培養上進心唔係靠鬧？子女一旦失控教你點應對！► 即睇