早兩個禮拜恒指公司終於正式宣布，11月起主要上市的外國公司就可以納入恒生指數及恒生科技指數選股範疇。而最大機會叫胡染藍嘅就係PRADA(01913)同新秀麗(01910)，呢兩隻都係外國公司之餘市值夠大，日均成交額都有幾千萬，所以明係港交所畀好牌佢哋上。
　　唔知係咪想陣香港味重啲，就喺港交所公布之後，新秀麗就宣布搵咗Jeffrey魏浚笙來做代言人。今次係新秀麗第一次搵香港明星代言人，之前都只係搵過韓星李棟旭同神州嘅楊洋做代言人，第一次就用一位新晉藝人做代言人，可以見到新秀麗未來嘅目標應該都想主打年輕人市場。
　　同股票Number一樣，新秀麗1910年喺美國創立，2011年就正式喺香港上市，上市至今都12年，所以都算係老牌公司兼老牌股票。不過Jeffrey可以話係香港現今新一代嘅當紅藝人，各大類別品牌廣告都見到，寶礦力、藍妹、譚仔(02217)、保誠(02378)、BCT等等，金融到食品都見到佢，堪稱係廣告寵兒，加上只係25歲，絕對係年輕一代嘅代表，新秀麗搵得佢，好明顯都想令人耳目一新。
　　新秀麗難得請代言人，一請就唔手軟。呢輯廣告特登去法國拍，由Jeffrey拖住篋喺法國街頭，靚人靚景都夠曬賞心悅目，同時都為新秀麗呢個名增添返份年輕活力。Jeffrey自己喺IG都話，今次都係佢第一次去到歐洲拍廣告，仲多謝埋品牌同團隊合作。
　　雖然如果講染藍，二揀一嘅話孖屐普遍都估PRADA大機會啲，始終恒指公司一向都對大市值比較偏好，PRADA到今日為止市值成1525億銀，計落實係大成數一啲。不過新秀麗市值都有348億銀，同目前藍籌入面最細市值嘅碧服(06098)(312億銀)同恒安(01044)(354億銀)都差唔多，算係過到門檻，所以都可以話係染藍黑馬，唔知今次搵代言人又有無幫助呢？請請！
　
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇】拜登宣布競逐連任，若民主黨讓賀錦麗代替參選會否有效爭取選票？► 立即投票