中美關係仲係僵，魚缸跌得認真傷！除咗ATM全軍覆沒，內房、內需今日走勢都幾衰。只有「蔚小理」表現好啲，可能因為新能源車購置稅減免延長到2027年。
　　6月2日，國務院常務會議要求延續同改善新能源汽車車輛購置稅減免政策，決定將新能源汽車車輛購置稅減免政策延長到2027年年底，減免力度分年度逐步退坡，並對新能源乘用車減免車輛購置稅設定減免稅限額。
　　財政部、稅務總局、工信部今日聯合發布公告，對喺今年1月1日到2025年12月31日期間購置嘅新能源汽車免徵車輛購置稅，每架新能源乘用車免稅額唔超過3萬人仔。另外，對2026年1月1日至2027年12月31日期間購置嘅新能源汽車減半徵收車輛購置稅，每架新能源乘用車減稅額不超過1.5萬人仔。
　　財政部副部長許宏才今日喺新聞發布會上話，初步估算實行延長政策，2024至2027年減免車輛購置稅規模總額將達到5200億人仔。理想(02015)創始人、董事長李想對政策表示歡迎，更加指出團隊要達成2025年嘅公司戰略目標「無任何藉口」。至於蔚來(09866)就話，由依家到2027年，純電動車仍然享有購置稅減免優惠，令公司相對於燃油豪華車，喺購置成本上有好大優勢。
　　今日「蔚小理」逆市造好，蔚來曾經升超過4巴仙，理想同小鵬(09868)都升住收。延長汽車購置稅減免係有啲刺激作用嘅，但呢個政策之前都run咗一段時間，暫時未有其他新嘅政策出爐，實際幫到「蔚小理」同其他車企有幾多呢？對股價嘅刺激作用又會有幾大呢？到時大家又要望實車企嘅銷售數據喇！請請！
　
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》【奧運劍擊熱】大師兄張小倫親身分享！贏在起跑線=壓力？如何培育子女有卓越成就？► 即睇