人民幣櫃台今日開通，之前就連官方都預計人民幣櫃台成交唔會好熱烈，結果都真係一如所料，24隻人民幣櫃台股份總成交都只係得1.63億，魚缸要靜起上來，出盡方法都推唔郁！
　　連帶之前熱炒嘅AI概念都攤凍曬！不過今日AI概念之一嘅美圖秀秀(01357)就忽然炒起兩成有多，原來係公布咗新AI模型。今日美圖搞咗個以「AI時代的影像生產力工具」為題嘅第二屆影像節，一次過重炮公布7樣新產品，包括美圖嘅AI大模型「MiracleVision 奇想智能」，呢個係美圖嘅AI底層學習模型，之後6樣新產品都係建基於MiracleVision之上；包括AI視覺創作工具「WHEE」；AI口播視頻工具「開拍」；桌面端AI視頻編輯工具「WinkStudio」；主打AI商業設計嘅「美圖設計室2.0」；AI數字人生成工具「DreamAvatar」同埋美圖AI助手「RoboNeo」。
　　美圖為MiracleVision所設計嘅slogan就係「懂美學的AI視覺大模型」，CEO吳欣鴻話，美圖將長期積累落來嘅美學認知融入MiracleVision，搭建咗基於機器學習嘅美學評估系統，為模型生成結果加上「美學分數」，從而不斷提升模型對美學嘅理解。美圖又提到，MiracleVision將會具備獨特嘅美學創作者生態，有藝術家、設計師等具有深厚美學背景嘅專業人士，共同參與視覺大模型嘅建設。
　　由美圖公布新嘅幾款產品來劃分，可以分為「AI圖片」、「AI視頻」、「AI設計」同埋「AI數字人」四大應用層類別。如果百度(09888)文心一言係關於文字AI生成，係咁美圖MiracleVision就係集中影像生成嘅AI。記得之前文心一言被人踢爆係用外國開元軟件來生成圖像，令神州網民都大為失望。如今美圖呢個就真正係國產嘅影像生成AI模型，加上美圖喺P相方面喺神州都有一定地位，需求量都應該唔成問題，係差在商業化同變現程度做得有幾好，所以一公布出來都幾令孖屐期待，請請！
　
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【與拍賣官看藝術】常玉作品屢創天價，背後其實藏著跌宕起伏的人生► 即睇