嚟到8月業績高峰期，「信義系」股票都放榜喇。信義玻璃(00868)公布，截至6月30日為止中期純利約33.05億銀，按年跌38.5%。收益約136.5億元，只係升0.5%。毛利52.42億元，大幅減少27.2%。毛利率下降14.6個百分點，到38.4%。
　　集團解釋，因為內地孖屐需求比較弱，加上供應短缺，搞到浮法玻璃售價下跌，原材料同能源成本大幅增加，浮法玻璃毛利率下跌，而汽車玻璃業務毛利率升少少。另外，集團提到行政開支升到13億銀，銷售及推廣成本升至9.5億銀。
　　博客覺得信義玻璃從事浮法玻璃行業，即使汽車玻璃業務影響唔大，但近排斷供「爛尾樓」事件已經打沉咗好多人買樓嘅意欲，樓市唔好幾影響玻璃需求，好自然拖低整體業績表現，而需求keep住咁弱，信義玻璃股價好難短時間番到身。
　　的確，信義玻璃股價由6月2日反彈浪嘅高位19.64銀回落，期間走勢反覆向下，7月中旬開始畀條10天線壓到翻唔到身，依家10、20、50同100天線齊齊插水，今朝更加見過14.4銀，創舊年12月以嚟嘅新低，短線睇怕仲有排捱，即使9日RSI已經跌到24，接近嚴重超賣，但依家玻璃行業環境麻麻哋，魚缸個勢又咁頹，博客唔建議大家依家買入。如果睇月線圖，現價距離50個月線13.2銀都幾接近，而股價自2016年3月開始都未失守過呢條線，大家不妨等股價回到13.2銀，再配合行情再買入。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。

《說說心理話》【親子溝通】怪獸家長原來都有呢啲通病！相處有一件事切忌？► 即睇