今日個「孖屐」真係來回地獄又折返人間，早上低開１８０點後，一度低見２９７５５點跌２０７點，油佬略有支持咁款，之後大戶開始落力掃返上去，中午市又上返三萬關附近。午後繼續喺三萬點之上，最多反彈９３點，全日高見３００５５點，但始終缺乏反彈動力，缸友可能都係等內銀季績同下個禮拜一（２９日）嘅貿易談判啦，最終大市收報２９９６３點，跌唔夠一點，十天線（３０００９點）同三萬關如夢幻泡影！成交額１０７２億銀，按日升近１８巴仙。國貨收報１１７３１點，跌３７點或近半巴仙。
　　Ａ場方面都係持續拉鋸，滬指喺三千二關上上落落，收報３１９８點，跌１６點或半巴仙。深指收報１０１２４點，蒸發９點或近１巴仙。
　　大隻藍戰士方面，大象（０００５）走勢靠穩，升兩格，報６７﹒７銀。生發發（００３８８）微挫１格，報２７７蚊。ＱＱ（００７００）未受與任天堂合作消息影響，全日微漲近半巴仙，報３９３銀。中移動（００９４１）跌唔夠巴仙，報７５﹒４５銀。ＡＩＡ（００９４１）輕微靠穩，升近１巴仙，報８０﹒３銀。建行（００９３９）同工行（０１３９８）唔見咗近１巴仙，報７﹒０１銀同５﹒９５銀。
　
＊豬肉價飆升萬洲好標青，大摩吹淡風券商步寒冬＊
　
　　神州因為豬瘟問題而令豬價急漲，農業農村部今日開聲，話預計全年豬肉產量會下降，今年第四季度活豬價格將會突破２０１６年嘅歷史高位。部分豬肉股都飛高高，萬洲（００２８８）今日又創歷史新高，高見９﹒９５銀，全日收漲４巴仙，報９﹒６銀，係全日最勁嘅藍戰士！中糧肉食（０１６１０）抽高近１巴仙，報３﹒１８銀。超大現代（００６８２）飛高逾１巴仙，報０﹒０９５銀。普甜食品（０１６９９）隨市跌近３巴仙，報０﹒３８５銀。
　　大摩發表研究指，將神州銀河（０６８８１）評級由「中性」降至「減持」，惟「他屐」則由４﹒４銀上調至４﹒９銀。另外，該行同時將所覆蓋嘅神州券商Ａ股評級，全線由「中性」降至「減持」。大摩睇得咁淡，神州券商佬全線受壓，神州銀河挫逾３巴仙，報５﹒３９銀。中州證券（０１３７５）跌逾３巴仙，報２﹒１５銀。中信証券（０６０３０）唔見咗近２巴仙，報１７﹒６８銀。光大證券（０６１７８）蒸發近兩巴仙，報７﹒７１銀。海通證券（０６８３７）跣低近１巴仙，報１０﹒３２銀。
　
＊制裁又升溫油價再狂奔，油升人仔跌鐵鳥股價折＊
　
　　花旗國日前（２２日）宣佈，將喺５月起取消之前對８個經濟體包括神州、印度等向伊朗買石油嘅豁免，國際油價急升。布蘭特原油期貨曾漲近３巴仙至每桶收報７４﹒０４美銀，帶動三桶油造好。中海油（００８８３）早段曾漲逾２巴仙，收市前升幅收窄，報１４﹒９６銀升逾１巴仙；中石油（００８５７）亦揚逾１巴仙，報５﹒１１銀；中石化（００３８６）偏軟，微跌唔夠半巴仙，報６﹒０９銀。
　　國際油價上升，加上人仔匯價下跌，人仔離岸價（ＣＮＨ）最低見６﹒７２３３，跌１１２點子，神州鐵鳥普遍受壓。南航（０１０５５）急挫逾７巴仙，跌穿２０天線（約７﹒１６５銀），報６﹒８６銀；國航（００７５３）亦瀉近７巴仙，報９﹒３８銀；東航（００６７０）更走低近９巴仙，報５﹒４７銀；國泰（００２９３）失１０天線（１３﹒８０２銀）同廿天線（１３﹒６５６銀），跌逾３巴仙，報１３﹒４８銀。
　
＊嚴控炒作風內房好陰功，國壽發盈喜股價急跳起＊
　
　　中央政治局會議喺上星期五（１９日）開會，會上重申「樓唔係用嚟炒嘅」；官媒亦都指出，政府部門要加強樓市虛假信息同埋嚴厲打擊炒作行為，內房佬仲唔全線腳軟咩。萬科（０２２０２）瀉逾４巴仙，報３０﹒９５銀；融創（０１９１８）挫近４巴仙，報４０﹒１銀；世房（００８１３）唔見咗超過３巴仙，報２３﹒４５銀；中海外（００６８８）跌近２巴仙，報２８﹒２５銀。
　　國壽（０２６２８）發盈喜，預計今年第一季淨利潤按年勁升八成至一倍，至１３５﹒１８億人仔，造就佢今日逆市有追捧，全日彈起近２巴仙，報２２﹒２５銀。其餘內險股就個別發展，平保（０２３１８）跳起近１巴仙，報９５﹒２銀，但就高見９６蚊，創１５個月高，勁！新華保險（０１３３６）跌近１巴仙，報４５﹒８５銀；太平（００９６６）唔見近２巴仙，報２５﹒４銀；財險（０２３２８）蒸發近兩巴仙，報９﹒２２銀。請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。

【etnet 30周年】多重慶祝活動一浪接一浪，好禮連環賞！ ► 即睇詳情