數數手指，米字國上星期五（２４日）決定「脫歐」，到今日為止都唔夠一星期，但係不論歐美魚缸，定係香江呢邊，都好似已經走出咗「脫歐」恐慌，噚晚（２９日）道指又輕鬆收復２８４點報１７６９４，歐洲三大魚缸更走前２至近４巴仙，缸友不禁問：係咪真係無事架……？
　　老老實實，小傳就覺得唔好太過坐定粒六，米字國都仲未開始同歐盟國家傾數，之後會點發展都無人知。香江呢幾日叨光彈高，今日（３０日）恒指最高升近４００點至２０８２８，收復埋廿天（２０６４１）及五十天線（約２０５６２）。不過，下晝歐洲開市腳軟，恒指即時嚇一嚇。好彩最後虛驚一場，大市埋單收升３５８點收２０７９４，國指踢高１４１點報８７１２，成交逾７２５億銀，開心迎接一連三日嘅回歸假期！
　　總結呢個月表現，經歷Ａ場三度入摩失敗，同埋米字國爆冷脫歐之後，恒指都能站穩住腳，只係比５月跌咗２０點，成功同「六絕」Ｓａｙ　Ｇｏｏｄｂｙｅ！
　　
＊領展嗌唞唞港鐵升不休，樓價指數好磚頭跳跳舞＊

　　魚缸今日生猛返晒，唔少走去避難嘅資金出返晒嚟。領展（００８２３）今朝試過高見
５４﹒２５銀上市新高，但臨尾要倒逾２巴仙收５２﹒８銀。中電（００００２）同樣走唔甩，股價破頂後倒跌，跣低唔夠半巴仙，收報７９銀，兩者包辦最差藍戰士。至於港鐵
（０００６６）就好好多，有逾１巴仙收穫，收報３９﹒２銀，繼續破頂。
　　香江私人磚頭售價指數連升兩個月，報２７５﹒５點。地產佬聽到都心花怒放，長實地產
（０１１１３）踢高近２巴仙，收報４８﹒４銀。恒地（０００１２）同新地（０００１６）就齊齊企高逾２巴仙，收報４３﹒５５銀及９３﹒０５銀。

＊瑞士佬護航友邦氣勢旺，長和再上躍油佬亦唔弱＊

　　自從米字國脫歐之後，連跌咗三日嘅友邦（０１２９９）呢兩日發力狂升，由於喺瑞士佬瑞信護航之下，今日一口氣飛越十天線（４５﹒１３銀）同廿天線（４５﹒４０７銀），埋單踢起逾３巴仙，報４６﹒３５銀，勁！
　　噚日始見反彈嘅超人一號（００００１）有消息傳出，指喺歐洲併購ＶｉｍｐｅｌＣｏｍ又作讓步。另一方面，早前長和收購Ｏ２受阻撓之後，家陣Ｏ２母公司已經放棄分拆Ｏ２上市，唔知會唔會食回頭草，再賣畀超人呢？不過超人一號就已經好畀力，再踢起２巴仙，報８４﹒５５銀。長建（０１０３８）同電能（００００６）亦都飛起近２巴仙同近４巴仙，喺汕頭會見廣東省省長嘅嘉誠哥唔知會唔會笑逐顏開？
　　孖屐氣氛見好轉之下，油價表現亦都唔弱，布蘭特８月期油收漲４巴仙，令到油佬起舞，中海油（００８８３）、中石化（００３８６）、中石油（００８５７）分別浮起２至３巴仙。

＊整合進展佳中海外好ｈｉｇｈ，華潤撐萬科齊齊笑呵呵＊

　　上海再現地王，奉賢區地塊以逾１７億銀人仔，發展商圍皮可能要賣到每平方米５﹒６萬銀人仔。同業咁睇好後市，難怪今日神州磚頭全部扯高。其中，中海外（００６８８）指同中信股份（００２６７）物業資產整合工作進展順利，中海外同時獲大摩重申「加碼」，股價隨即掟高逾６巴仙，收報２４﹒５銀，成最佳藍戰士。中信股份就進帳近３巴仙，收報１１﹒２８銀。其他街坊，好似碧桂園（０２００７）及恒大地產（０３３３３）亦有近１至３巴仙升幅。
　　華潤集團發聲明指唔同意寶能系提出炒晒所有萬科（０２２０２）董事及監事嘅提議。喺主要股東支持下，萬科急急腳走高逾４巴仙，收報１５﹒２銀。華潤置地（０１１０９）亦揚近５巴仙，收報１８﹒１元。

＊行使換股債阿里撐銀泰，隆成玩財技沽壓好難避＊

　　阿里巴巴宣布悉數轉換銀泰商業（０１８３３）所有嘅尚未轉換可換股債券，換股價係
７﹒１３０９銀，較上日收市價溢價足足近兩成！公司今日踢起７巴仙，報６﹒４２銀，現價仲係低過換股價呀！
　　不過要數升幅，銀泰商業就唔夠中國基建港口（０８２３３）咁犀利啦。公司宣布，以代價４７１５萬人仔，向湖北政府收購一個碼頭項目六成權益，以內部資源撥付，話可以配合「一帶一路」咁話！結果股價踢起２５巴仙，報１﹒８７銀，創上市以來新高！
　　呢個世界有人歡喜總有人愁，有大升魚仔自然有大跌嘅魚仔，好似隆成（０１２２５）咁，打算五合一後一供二，咁複雜嘅財技，點會唔嚇怕缸友？今日就唔見逾３８巴仙，報０﹒０６８銀，成為跌幅最大魚仔！涉及財技嘅公司少掂為妙，早兩日紅股除權嘅美捷匯（０１３８９）今日大成交跣低近２９巴仙，報１﹒８９銀，希望缸友走得切啦！假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。

樂本健【秋日開倉26 - 27/9】保健品低至$20！► 火速行動