臨近假期，魚缸都淡靜好多，惟花旗國方面近排頻頻收緊對神州晶片嘅制裁，孖屐炒作國產替代加快概念，刺激一眾晶片股落鑊。今個月初，花旗國對神州近140間實體進行晶片出口管制，要求一概拒絕名單上嘅神州公司嘅申請購買。呢份名單唔單止適用於花旗國本土嘅廠家同供貨商，仲手長長，要求埋韓、日、荷蘭等國家同地區嘅公司採取相應行動。近排，花旗國又要求英偉達調查過去一年旗下產品如何流入內地；今日又有消息放出，話花旗國計劃將神州公司算能科技納入黑名單，因其違規將台積電晶片供應俾華為。呢啲舉措，無疑係進一步打擊神州高端晶片嘅發展。

　　但今時唔同往日，神州都企硬，一邊推反制，一邊加大力度投資發展本土晶片企業。據內地媒體嘅數據統計，目前神州已有47座晶圓廠，其中12英寸晶圓廠22座，8英寸廠25座。研究機構預計，到2027年神州成熟製程產能嘅全球佔比將達到39%。據神州國家統計局發布嘅數據，今年前11個月，國產晶片出口額首次破萬億關，達1.03萬億元人仔，同比增長20.3%。神州晶片行業快速增長，成績可圈可點。

　　不過，晶片行業嘅複雜性經常容易被忽視。雖然晶片只係一個產品，但係佢嘅種類就有幾十種大門類、上千種小門類。宜家嘅報道動輒就稱「晶片技術」取得重大突破，就好容易誤導讀者。以神州目前嘅優勢為例，主要集中喺成熟製程晶片，例如應用喺家電、汽車等領域嘅產品。相比之下，尖端技術，例如用於AI訓練嘅高端晶片，花旗國仍然保持住明顯優勢。

　　目前，全球最先進嘅量產製程係台積電喺2022年實現嘅3nm技術，並計劃喺明年量產2nm晶片；反觀神州，目前量產嘅最小製程仍停留喺5nm。即使係今年引起熱議嘅華為Mate 70系列手機，據外媒揭露，其晶片仍沿用Mate 60嘅7nm製程。

　　值得注意嘅係，神州作為全球最大嘅晶片消費市場之一，有不少先天優勢。例如，高度依賴神州市場嘅美國晶片公司喺過去一年不斷遊說國會同白宮，試圖影響政策方向。歐洲晶片企業為咗保住神州呢塊大肥肉，直接喺神州建廠同成立合資公司。

　　晶片問題上，神州有可圈可點嘅進步，但亦要正視同行業領頭者嘅差距。神州晶片行業嘅崛起，背後係龐大市場需求同政策支持嘅結合，亦係面對外部壓力下嘅主動突圍。但值得反思嘅係，晶片技術嘅追趕係一場長跑，而非短期內可以完成嘅目標。單純依賴成熟製程或者國內市場，難以支撐全面嘅技術突破。正如現時全球半導體行業嘅競爭所揭示，技術霸權從來唔係某一國家可以永久掌控嘅，神州唯有不斷追求創新，先至可以喺未來嘅科技格局中占據更有利嘅位置。請請！
　　
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇？】皇馬巴塞傳奇表演賽爆簽名會風波，26人買涉$20萬套票僅見部份球星15分鐘，你認為事件哪方須負較大責任？► 立即投票