雖然今年6月阿爺已經嚴打「金融茶」，但係嚴打嘅後遺症到接近兩個月之後嘅今日先慢慢出現。事發地點繼續係廣州芳村茶葉市場，今次爆煲嘅就係成立兩年左右嘅「泛茶」。
　　所謂「金融茶」，其實概念同龐氏騙局根本無兩樣，先用高回報氹你買落茶餅，一段時間後用承諾高價買返，隨後就逐步吸引羊牯投資更多，但所謂嘅回報就係來自其他新羊牯嘅投資。喺年初爆煲嘅鼎益豐，最後爆出事涉竟然超過1300億人仔！而今次泛茶嘅涉款規模亦都過百億人仔。
　　泛茶爆煲過程同恒大(03333)有少少類似，都係當監管政策出台之後，種種踩界嘅事就開始浮面，上個月底泛茶公布公司同部分經銷商銀行帳戶被凍結，隨後就開始兌付唔到產品，然後到今個禮拜就開始扭咗幾方案出嚟想拖住唔回水，但呢個時候羊牯終於醒覺，知道根本已經上當，先至踩到上去泛茶總部「維權」。
　　飲茶係高深學問，個個都飲茶，但唔係個個都識飲茶，買得金融茶嘅當然都係唯利是圖。但短時間內有高回報，明顯就係典型龐氏騙局嘅模式，會落疊嘅明顯就係唔知何謂龐氏騙局，固之然係蠢；而另一種就係明知係龐氏騙局都照落手，以為自己身手快，一個華麗轉身就可以止賺走人。後面呢種理論上係可行，好多人以為自己係呢種，但偏偏轉身唔夠快，最終都係血本無歸。
　　近年神州股市、樓市都容易損手，對比之後茶葉似乎係更為大眾熟悉嘅產品，容易就畀人有錯覺好掌握，但偏偏有人就用呢一點嚟搭雞棚，令更多人落疊。好在呢次總算係早爆早完，持續未夠一年阿爺就著手打擊，免得繼續令呢種騙案風行，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》【驚恐症來襲】無預警發作...患者親身講述得病經歷及康復過程！必要時自己做一件事可幫到手！► 即睇