27/04/2022 16:31
《炒股戰記-施富》微創機器人技術上有起色,香港寬頻好出「息」
兩個禮拜又過去喇,魚缸跌穿埋兩萬點,唔係單純因為俄烏問題咁簡單,中央放水唔太夠力、阿爺監管、加息預期等等,北水臨近月尾又出又入,取態好唔穩定,魚缸由4月高位22523回落,最低見過19665。聽日就係期貨結算日,下個月初聯儲局開始議息,走勢上都唔太樂觀住。
睇番個倉先,雖然京東(09618)沽完再買過,但結果同目標價250銀差好遠,月內最低更加試過195.2銀,已經跌穿晒213銀嘅止蝕位,即使近幾日回升番,富仔都嚴守止蝕,喺213銀平咗倉,計落都唔係輸得太多。即使近幾日股價回升番上接近220銀水平,但係嚟緊議息可能會幾狠,對科技股唔太著數,富仔暫時都唔會揀科技股住。
至於太平洋航運(02343)表現就相當穩定,富仔喺3.6銀買入之後,走勢穩中向上,最高升到4月19號嘅4.3銀,而公司喺4月21號除淨,富仔早喺4.1銀獲利離場,呢度到賺咗近一成四嘅profit,再加埋末期息每股4毫2仙、特別息每股1毫8仙,合共派六毫子股息(5月5日派送),都算唔錯喇!
*微創機器人短線目標30銀*
今次富仔個倉加咗兩隻股票,第一隻係微創機器人(02252)。佢係一間從事開發、製造及商業化手術機器人嘅公司,舊年度虧損增加到5.8億人仔,兼且宣布唔派息,睇落唔係幾吸引。不過,佢係一隻B仔股,始終係一間初創醫療公司,要賺錢的確要俾啲時間,而製造手術機器人嘅公司唔算太多,長遠嚟講佢喺醫療行業都有優勢,因為可以幫到醫生處理更微細、更複雜嘅手術,微創機器人未至於睇到咁死住。
另一個比較好啲嘅消息係,微創機器人自主研發嘅「鴻鵠骨科手術機器人」已經獲得國家藥品監督管理局上市批准,將會成為第一款兼唯一一款搭載內地企業自主研發,自有知識產權機械臂,並且獲准上市嘅骨科手術機器人,打算今年喺內地開展臨床試驗。
微創股價喺3月3號開始滑落,由最高48.5銀跌到3月15號最低19.92銀,唔見咗超過一半。不過,股價自此之後回升兼步入橫行整固階段,近兩日反彈超過一成,MACD牛差距又闊番,短期應該仲有啲升幅。富仔已經喺23.5銀買咗2000股,準備喺30銀附近先沽出1500股獲利,剩低500股就再上望42銀。再講多次,呢隻係B仔股,波幅會比較大,所以止蝕位都唔可以定得太遠,收穿21銀就止蝕離場!
*香港寬頻收息吸引*
另一隻係香港寬頻(01310),呢隻股可以話係其中一隻比較好嘅收息股,過去六個年度派息比率全部超過一倍,而嚟緊5月將會派中期息。
集團舊年全年純利2.07億銀,按年升112.9%,期內營業額114.64億銀,按年升21.3%,主要因為智能手機銷售收益大增251%到17.22億銀,加埋HKBN JOS全年經營業績唔錯,令到企業方案同相關產品收益增加。
大行瑞信就話,香港寬頻依家估值合理,不過佔舊年收入四成三嘅企業市場唔夠強勁動力,估計未來三年股息收益率介乎8%至9%。事實上,香港寬頻舊年派末期息3毫7仙半,略少過2020年同期嘅3毫8仙,更加係上市以嚟末期息第一次按年減少。不過,集團派中期息3毫9仙,按年增加5.4%,令到全年派息拉高番到7毫6仙半,自2015年上市以嚟連續第六年派息按年有增長。
不過,5月份開始,聯儲局議息結果好可能影響到魚缸表現,揀股方面可以諗下啲防守性較強嘅收息股,頂一頂住呢個「大浪」,香港寬頻係個唔錯嘅選擇。日線圖睇,股價今年2月衝高到11.1銀keep後住落,低見8.52銀之後反彈,並且開展橫行走勢,MACD牛差距幾平穩。富仔喺8.6銀買咗10000股,目標睇9.2銀,如果跌穿8.2銀就止蝕。
沽出之股份及收益(虧損)
股份 | 股數 | 平均買入價(元) | 平均賣價(元) | 收益(虧損)(元) |
---|---|---|---|---|
太平洋航運 (02343) | 10000股 | 3.60 | 4.11 | 5100 6000(待收股息) |
京東 (09618) | 1000股 | 220.00 | 213.00 | (7000) |
套現:260100元(包括6000元待收股息)
模擬投資組合
股份 | 股數 | 平均買入價(元) | 現價(元) | 總值(元) |
---|---|---|---|---|
電盈 (00008) | 10000股 | 4.03 | 4.19 | 41900 |
領展 (00823) | 1000股 | 62.50 | 67.20 | 67200 |
吉利 (00175) | 5000股 | 12.00 | 11.58 | 57900 |
開拓藥業 (09939) | 3000股 | 25.00 | 23.90 | 71700 |
微創機器人 (02252) | 2000股 | 23.50 | 26.10 | 52200 |
香港寬頻 (01310) | 10000股 | 8.60 | 8.64 | 86400 |
股票市值 : 377300元
剩餘現金 : 552300元
組合淨值 : 899600元
* 數據截至4月27日收市
【你點睇】本港主要銀行跟隨美聯儲減息,你對樓市前景有否信心?► 立即投票