早幾日政府終於公布大熊貓命名大賽結果，搞笑之餘又有啲符合預期，都係叫返「安安」「可可」，話取其「安可」意思，希望好事繼續Encore咁解，如果有嘅話。據報海洋公園主席龐建貽都有份揀選命名結果，唔知佢係咪都好想呢個名可以為海洋公園帶嚟好運呢？皆因海洋公園盤數，至今仍然係未上岸。

　　海洋公園先苦後甜，首先公布截至今年6月底嘅年度業績，之後再用大熊貓沖喜，當然都係盤數唔太得先要用呢招，起碼而家大眾一定記得熊貓先過盤數。以帳面數睇，全個2023至2024年度轉盈為虧7180萬銀，數字上已經唔靚仔，龐建貽上立法會時更被「紅隊大隊長」田北辰篤爆水上樂園全年度淨蝕2億銀，田二少更建議不如索性將水上樂園交波畀康文署就一了百了，剩低嘅海洋公園項目已經接近收支平衡，就此拗正盤數。

　　不過比起水上樂園嘅蝕錢，更令人值得關注嘅係，呢份全年財務報表由安永負責核數，但喺報表嘅第一版就畀出「無法表示意見」。「無法表示意見」算係本港四級審計意見入面嘅第三級，差過「無保留意見」同「保留意見」，但好過「反對意見」。翻查過去幾年，由2019至2020年度開始，核數師就對報表提出「無法表示意見」，當時係由德勤負責。隨後嘅2020至2021年度，德勤繼續畀出「無法表示意見」；到2021至2022年度起改由安永核數，隨後至今連續三年都繼續係畀「無法表示意見」，即係海洋公園已經連續五年被核數師「無法表示意見」，換轉係上市公司已經一早出事。

　　呢五個年度兩任核數師最大質疑嘅地方，就係關於公園的物業、機器及設備資產值嘅問題，過去五個年度核數師都係話無法確認相關嘅價值，無法就相關「減值評估相關的假設獲得足夠適當的審計證據」，因而要畀出「無法表示意見」。就呢一點會計界立法會議員黃俊碩都喺當日向海洋公園質詢，海洋公園CEO黃嗣輝就回答，核數師要考慮未來營運假設同預測，而疫後轉型後核數師認為充滿變數，「核數師未能確認營運預測能唔能夠同我哋（海洋公園）預期一樣」。

　　其中「物業、機器及設備和使用權資產」係帳面數，涉及唔少預測部分，所以可以造好講佢預期幾多而定。一次半次未符合預期可以，但連續五個年度核數師都喺同一方面「無法獲得足夠適當的審計證據」，咁就難免令人憂慮究竟相關估值，係咪有海洋公園預計得咁好。究竟係合理預期，定只係「憑空」幻想，業績出嚟就自有定論，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

想要獨家投資理財Tips？即Like etnet 全新Facebook專頁► 立即讚好