結果上個禮拜六嘅財政部記者會都係無咩料到，雖然早就無乜預期，但結果今朝都跌咗500幾點，今日收市前叫企得返上21000，但都唔算好穩陣，一定要有返啲消息打一打底先好啲。而今個星期三就係超哥公布任內第三份《施政報告》嘅大日子。
　　記得上年差唔多時間，超哥喺《施政報告》期間宣布下調股票印花稅，仲特登揀起讀到半路，咁啱到12點休市期間先讀到，時間嘅控制能力真係啱啱好。早排都有啲聲音提起，會唔會今年再可能加碼，再減多次股票印花稅，咁就唔止係恢復原價，而係真係減咗。但近期吹風又好似唔覺成數好大，唔知最終成唔成事，到時食飯時間真係要睇實。
　　除咗股票印花稅之外，都有意見提到可以減低交易手數，降低入場門檻以吸引資金進場。不過咁耐以來係以一手手做交易，降低每手股數可以令人更容易買到正股，但對於輪商就未必真係咁著數。以往牛熊證、窩輪都被視為可以用低啲價格買到相關資產升跌嘅工具，如果正股容易買咗，有部分人會寧願買返一手都未必會揀高風險嘅輪，所以都見到呢項嘅成數好似無上面咁多。
　　至於另一瓣成數大啲嘅，可能就係今朝《南華早報》吹風嘅北都發展，計劃引入更多製藥公司喺北都開臨床試驗室，打造成生物醫學創新中心。但實行起上嚟，最緊要都係講有幾優惠，咁先可以吸引到初創藥企入嚟，而且發展需時，未必喺超哥任內就可以搞得掂。
　　仲有兩日就讀報告，但可能成份《施政報告》都未必就阿爺講兩句咁有刺激作用，除非股票印花稅真係大減特減啦，如果唔係真係幾難有驚喜，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

想要獨家投資理財Tips？即Like etnet 全新Facebook專頁► 立即讚好