今日隻松景科技(01079)好似有資金流入情況，公司發盈喜，預期截至6月30日止年度純利不少於4000萬元，去年度虧損1億元。該集團指，轉虧為盈因收益顯著增加、一般及行政支出下降及出售附屬公司收益等。
　　公司今年年初出售附屬公司收益約5740萬元，所以先話盤數叫正數，不過有趣嘅係，公司係無官網嘅，而維基資料顯示，佢係負責製造電子零件，再仔細睇佢旗下有間XFX公司。
　　呢間公司博客略有聽聞，其實佢係一間OEM廠，代工AMD顯示卡RADEON系列（行內人俗稱A卡），其實OEM代工廠本身好好搵，如果你係代工NVIDIA系列，你睇御三家（華碩、技嘉、MSI）就知；不過A卡目前係遊戲界都好小眾，好少遊戲玩家會買，除非你本身係AMD死忠啦，所以呢，呢個都可能係公司股價點解變仙股嘅原因。
　　雖然公司好似唔係幾想透露自己資料咁款，不過而家都係2024年喇，要起一間公司底確實唔難。博客認為，一間OEM代工廠，股價絕對唔止值六個仙，特別今時今日講緊AI主導年代，要炒起一隻「顯卡股」絕對唔難。
　　預計公司盤數今年轉正數後，由於股價細，短期內有波動唔出奇，得六個仙炒到上一毫亦唔難，可能短期內會有更多炒上炒落動作唔一定，博客覺得如果想考自己眼光，松景科技可能係一隻其中擺係list的細價股，而風險一定存在，投資者要自己考量。


《編者按》本欄搜羅即市傳聞，惟消息未經證實，《經濟通》亦不保證內容之準確性。

【香港好去處】etnet全新頻道盛大推出！全港最齊盛事活動資訊盡在掌握！► 即睇