魚缸雖然悶局，但總會有花生料為魚缸加鹽加醋，令到每日都奇妙處處。今日(3日)最大粒花生都莫過於昇能集團(02459)，由低開6%到大跌九成九，全日都話題滿滿，最後等唔收市，午市2:50終於先停牌。
　　大跌始於證監會公告，證監會話最近就公司股權分布進行查訊，截至8月19號，發現有27.65%股份由25名股東持有，同時有4.88%股份並無存入CCASS，連同另外大股東侯皓瀧所持嘅57.67%股份，呢度總計有90.20%股份，只有其餘9.8%由其他股東持有，確實係股權高度集中。
　　隨後昇能只係簡單回應，話已確保不少於25%股份由公眾人士持有，係符合上市規則。但開市後今日股價就一路暴瀉，全日愈跌愈多，更創下大跌99%嘅驚人跌幅，最終停牌前報0.325銀，跌九成八有多。
　　回顧呢場暴跌，有好多時間都好微妙。昇能其實都係趕死線放榜嘅股份之一，8月30號晚先出績，半年收入跌26%，純損按年擴大超過1000萬美金。業績咁差，但噚日開一成四之後盤中都有買盤撐返上去，最終收市只係跌4%多啲。而收咗市之後，證監就出咗呢份「股權高度集中」公告，引發今日嘅「精彩」跌勢。
　　記得上星期魚缸成交急增，市傳係因為MSCI換馬所以引發大成交。上個月中MSCI公布季檢結果，MSCI香港指數剔除太地(01972)，無新增股份；而香港小型股指數就剔除希瑪(03309)、IGG(00799)同天虹國際(02678)，新納入晉景新能(01783)、昊天國際建投(01341)、匯聚科技(01729)同埋昇能集團(02459)。有心人先搭棚，股票價格喺正式「入摩」嘅第二日就急跌，以往都有好多類似嘅劇本。
　　MSCI曾經係大摩下嘅指數管理公司，到2007年大摩由MSCI撤資，MSCI就同大摩無關係，但孖屐慣稱被入MSCI指數做「入摩」。MSCI旗下眾多指數係基金揀股嘅一個參考，所以一個指數係可以左右到好多基金嘅部署，不過都要睇有無基金追隨。而目前MSCI香港小型股指數都無乜基金追隨，所以實際影響其實唔多，入到都只係一個身份象徵。
　　MSCI指數調整通會根據股價以及成交量嚟選擇成份股，所以經常係季檢前都會有人炒起某啲股份博「入摩」，隨後正式獲納入之後就會急速散水，造成股價單日暴跌。
　　不過今次昇能就有啲唔同，並唔係無原無故咁散水，而係被證監踢爆「股權高度集中」而急跌，股價噚日換馬兼成績差都未急跌，但就一嘢被證監爆料急跌，即係可能有人未做嘢就已經爆煲了，今日中午有網民話心思思想低位接貨，結果去到下午仲要停埋牌，唔知股東們走唔走得切呢？請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

樂本健【雙11感謝祭】雙重優惠、多買多賞► 了解詳情