好似自從疫情之後，全世界人都一齊「放監」去旅行咁，咁你去旅行會揀邊間旅遊網站幫手買機票Book酒店？相信大家成日都俾Trip.com廣告洗版，事實上攜程集團(09961)就係佢母公司。
　　剛剛公司公布業績，截至6月底止錄得中期歸屬於公司淨利潤達81.5億元人民幣，較去年同期升103.3%；收入則達246.77億元人民幣，較去年同比升20.7%；每股盈利1.93元人民幣。此外，公司錄得第二季度歸屬於攜程集團股東的淨利潤為38億元人民幣，相比去年同期6.31億元人民幣增加約5倍；收入為128億元人民幣同比上升14%。
　　公司都解釋，因為飛機航班開始恢復正常，所以透過網站訂機票人數多左，收入升左。事實上，博客自己買機票訂酒店都係靠呢啲App，比較過其他App之後發現Trip.com確實係優惠多小小，所以大家都走去搵佢買。
　　今日公司股價裂口高開，升成一成一有多，暫時第一關阻力可能係400蚊左右附近，博客建議，如果有興趣玩輪玩牛可能會開心小，畢竟股價去到370幾蚊，每手成本都幾高下，想炒波幅係時後啦！十一黃金周又就快到，中國人出遊數據可能會成為股價催化劑都唔定！

《編者按》本欄搜羅即市傳聞，惟消息未經證實，《經濟通》亦不保證內容之準確性。

【慎防受騙】偽冒《經濟通》投資群組頻現，切勿誤信騙徒，如有疑問，請循官方渠道查詢► 了解詳情