魚缸今日仲有得繼續升，但一掂到條百天線就一觸即跌，後市要升上去恐怕都有啲難度。不過金價要升升升就一啲難度都無，啱啱呢個禮拜先破完頂，但呢日兩都企硬2520美金之上，而家個勢直頭係易升難跌。
　　今個禮拜就係央行行長一年一度嘅「夏季大旅行」Jackson Hole年會舉行嘅日子，本來係各地行長唞暑傾偈嘅時機，不過就演變成預告貨幣政策嘅一次機會，令到孖屐都非常關注。孖屐期待9月開始減息，於是就更加關注今年鮑威爾嘅偉論。所以呢排減息預期愈炒愈熱，美金回落，金價借勢破位。加上近期中東立立亂，更加令到金價無得跌。
　　記得今年初係一路講緊各國央行都揸金，尤其神州同印度愈揸愈多，神州更加創下連續18個月增持黃金嘅紀錄，更加令到連孖屐都跟手開始追入。但到今年5月開始，人行就忽然開始無再增持黃金，截至上個月底已經係連續三個月無再增持黃金，難免會令孖屐震一震，唔通金價要開始調頭？
　　但如今就比較似係，金價啱啱先開始升浪，人行停增持比較似係儲夠貨等升。7月起今價開始拗頭升，啱啱更加升破位。截至7月底中國總共持有7280萬盎司黃金，市值超過1849億美金，未來金價起行，人行就可以開始慢慢出貨，套返現就可以回歸返內銀體系，真正提高神州嘅流動性。
　　所以如果美國真正開始減息，理論上金價同人仔向上嘅機會比較大。美金回落嘅速度係點，都要睇返減息幅度同力度。而金價方面除咗美金，地緣政治都係一大推升因素，目前中東又打，俄烏又未打完，可能都會喺短期內撐住金價。而人仔升跌比較主要嘅因素就係美金嘅上落幅度，所以會影響金價嘅因素係比較多，換句話講上落可能係會比人仔為大。雖然黃金無息而人仔有息，但人行一向減息嘅幅度都係唔會快，所以人仔都係有較大機會穩定回升，要揀升得快啲，可能真係揸金會比較著數呢，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》【驚恐症來襲】無預警發作...患者親身講述得病經歷及康復過程！必要時自己做一件事可幫到手！► 即睇