今日有幾隻餐飲股不約而同發盈警，其中奈雪的茶(02150)公布，截至2024年6月30日止六個月，將錄得收入約24億至27億人仔，錄得經調整淨虧損約4.2億至4.9億人仔。虧損主要由於消費需求未回復，門店收入承壓，人力、折舊與攤銷等成本短期內優化調整空間有限，從而導致門店經營利潤率受到較大壓力。另外，集團計劃關閉部分表現不及預期嘅門店，並為此計提資產減值準備所致。
　　奈雪的茶今日股價跌逾一成，再創新低，低見1.52銀。不過，股價創新低對奈雪的茶嚟講唔係新鮮事，事關該股自2021年上市以來，股價整體反覆向下，一浪低於一浪，今日嘅新低隨時再被刷新。
　　唔單止發盈警，過去靠增加門店推高營收嘅策略可能受阻。截至第二季度末，集團直營門店數為1597家，而加盟店僅297家，直營門店數佔比達84.32%。今年一季度，奈雪的茶淨增23家直營店。但到咗第二季度，雖然新增48家直營店，但同時關店48家，亦即係話，第二季度門店淨增數為零。換言之，成個上半年淨增23家直營店，同舊年同期淨增126家門店根本無得比。相反。按照目前內地消費疲弱趨勢，下半年就算出現門店淨減少都唔令人意外。
　　為咗吸引加盟商加入，集團今年初降低加盟門檻，單店投資金額調低至58萬元起，限期簽約還能享受6萬元營銷補貼。不過，面對咁嘅經濟環境，有幾多人會因為加盟門檻降低而入市？奈雪的茶上市幾年來，只有2023年錄得1300多萬人仔利潤，仲要係錄得公平值變動有正數3600多萬人仔入帳嘅情況下先有1300多萬人仔利潤。而家中期就發盈警，全年業績更暗淡。現時內地經濟放緩，消費疲弱，茶飲呢啲非民生必需品容易受到衝擊。就算日後消費情況有所改善，但股市中仍有股價低殘嘅內需股可以選擇。因此，就算奈雪的茶股價創新低，博客仲係唔敢搏！

《編者按》本欄搜羅即市傳聞，惟消息未經證實，《經濟通》亦不保證內容之準確性。

夏日中暑高風險！即睇中暑迷思＋預防措施！► 立即了解