美國聯儲局尋晚議息之後，宣布維持利率不變，但鮑威爾就話，當局已有信心通脹正處於邁向2%的路上，最早9月減息係一個選項。其實，利率期貨已經反映炒家預期聯儲局有九成機會喺9月減息，同埋美息企喺5厘水平可以幾耐？企得愈耐，美國經濟受到嘅負面影響就愈大，同時亦令美國財政部嘅發債成本持續增加。
　　鮑威爾嘅言論令美股三大指數抽升，並且對息口敏感嘅科技股刺激作用最大，所以納指升幅亦係三者之中最大。英偉達近期極之波動，尋日升幅接近13%，有分析就將佢同比特幣比較，話英偉達仲癲過比特幣喎！咁又唔可以咁講，比特幣癲起上嚟可以單日升跌幾十個巴仙，2020年3月18日可以單日跌超過38%，2015年8月18同19日，就單日跌完29%之後，第日升番23%。你話比特幣癲定係英偉達癲？！
　　不過要留意，市場居然報道，美國眾議院前議長佩洛西喺7月26日增持咗1萬股英偉達，涉資100萬至500萬美金。同日沽出5000股微軟，涉資100萬至500萬美金。照兩者金額睇，好明顯係換馬啦！我估報道係想講連佩洛西都睇好英偉達，你仲企喺度？
　　不過，從另一角度睇，佢可能係唔睇好微軟，咁微軟都沽得，唔換英偉達可以換咩？仲有，但凡新聞報道話某名人買咗咩，個價唔係已經見頂就係好快見頂，向南走。當然，如果你坐得嘅話，英偉達唔應該有好大問題，但7月11日英偉達喺136.15美金見頂之後就係咁跌，今年初市場已經係咁炒美國科技股，小心出現大調整！之不過，AI就係未來，呢個趨勢唔會改變。
　　另一方面，英偉達早前宣布對其軟件產品進行一系列更新，佢發布嘅Nvidia inference micro services(NIMs)，旨在令到更多企業更容易地使用生成式人工智能，生成式AI係聊天機器人、語音識別同其他自動化人機交互背後技術，通常需要同眾多硬件、軟件同信息進行協調。由於好多公司無呢方面嘅專業知識，英偉達會就呢個服務收取費用，咁即係又開多個水源，如果英偉達跌到100美金，不妨買番啲看門口！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

夏日中暑高風險！即睇中暑迷思＋預防措施！► 立即了解