今日隻喆麗控股(02209)見有資金流入，仲炒到歷史新高，原來公司發盈喜，該集團預期於2024年上半年取得未經審核綜合純利不少於1110萬美元，較去年同期淨溢利約156.3萬美元增加約953.7萬美元或610.2%，主要是由於收益及毛利增加。
　　有趣嘅係，股價已經係六月頭開始炒起，當時單日成交額最高達4千幾萬，有春江鴨知水暖唔出奇，但如果早成兩個月就收到風，就算公司出定公告話「不知價格升因」，證監要做嘢都無法逃避。
　　公司主要做網上平台銷售，有幾個大平台包括YesStyle.com、AsianBeautyWholesale.com以及YesAsia.com。
　　網購呢幾年又再次轉型，特別係內地，因為消費降級，同時服務升級，好多品牌都自己建構平台，建立「客製化服務」，買件衫都可以真人線上客服為你服務。所以做網購除非好似「淘寶」「京東」咁大間，如果中小型網購企得穩又可以營利，確實係犀利！
　　不過犀利還犀利，股價炒到上歷史新高，如果有貨的話，建議都先行食胡先，畢竟六月個班春江鴨有機會開始出貨，貨底價分分鐘係兩三蚊；如果有興趣想撈，都要睇定小小，落返去呢個價位先好考慮。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】國家隊奧運健兒訪港，有市民指難以購票感到遺憾► 立即投票