今個月以來魚缸都回落唔少，但喺美國減息預期一路降溫，甚至今年可能無得減，令到美金都強返唔少，魚缸在內全球資產價格都因而有所回落，包括埋虛幣都跌唔少，不過近就有傳美國好大機會喺下個禮拜通過發行以太幣現貨ETF。
　　美國證交會年初「迫於無奈」批准比特幣現貨ETF上市，當時就帶動比特幣價再創新高。隨後香港反而一次過批出比特幣同以太幣嘅現貨ETF，如今美國先批以太幣現貨ETF就反而慢過香港。
　　據報今次包括貝萊德在內，總共有八間投行申請以太幣現貨ETF上市，其中大部分年初都有份出比特幣現貨ETF。相關投行高層提到，發行文件已經到達要解決「小問題」嘅程度，更加有相關人士提到如今已經到最後階段，預計將會喺一至兩星內就可以批准上市。
　　不過近期幣價大幅回落，以太幣現貨ETF推出可唔可以複製年初比特幣現貨ETF嘅熱潮都受到好多質疑。其中最大唔同就係年初聯儲局吹緊鴿風，大家對減息仲有好多憧憬，但到而家風向轉，美金又強返，幣市興奮程度大為減低，令到今次期望值都一同減低。
　　而另一個原因，就係以太幣嘅常用程度遠遠唔及比特幣。以太坊最初係強調區塊鏈嘅應用，但區塊鏈未正式普及，比特幣就已經先行炒起，亦都喺炒作之外被市場發掘到更多交易用途，成為最常用嘅虛幣。
　　反正美金轉強，幣價下半年都會比較受壓，短線係難啲上返高位，但美國批准以太幣現貨ETF都係一個里程碑，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》【親子溝通】怪獸家長原來都有呢啲通病！相處有一件事切忌？► 即睇