「江山如此多嬌」，神州國家主席習近平喺呢幅國畫前接待世界各地嘅元首同佢哋嘅夫人，「一帶一路」論壇就咁樣展開，印證住呢一個時代神州喺地球上嘅印記。政治局面變動不停，財金局勢方面，香江同花旗都載歌載舞，古臣得閒時睇睇花旗股市，發現粒粒皆星，想不到太平洋對岸嘅另一缸水，亦是如此多「嬌」。

＊花旗香江皆沾水，或令財源滾滾來＊

　　蘋果（ＡＰＰＬ）市值早前破八千億美金，香江呢邊ＱＱ（００７００）又不停破頂，喺科網大時代下古臣竟然無買過好似亞馬遜（ＡＭＺＮ）、特斯拉（ＴＳＬＡ）呢Ｄ股份，都有少少後悔。於是古臣近日先補習番，知道咗原來買花旗股票同港股最大唔同之處，就係花旗股票可以一股股咁買，唔使好似香江咁要一手手。以一股特斯拉大約３２４美金為例，唔計手續費一股只需要大約２５２７港元，入場門檻其實並唔係咁高。
　　但要隔山買牛，應該如何入手呢？其實缸友可以有三大類選擇，分別係外資券商、本地券商同埋本地銀行。外資券商方面，佣金收費相對較低，好似盈透咁每股收費０﹒５美仙，不過每單交易佣金最少都收１蚊美金；而本地銀行方面，匯豐銀行每單交易就劃一收１８蚊美金。如果講分便的話，缸友熟悉嘅本地券商都係唔錯嘅選擇，呢Ｄ公司設有網上美股平台，有Ｄ行連日股都可以買埋！第時當香江呢邊無資金炒作時，缸友都可以轉場玩美股，ｋｅｅｐ住財源滾滾來。

＊花旗魚缸群星湧現，價值投資者的樂土＊

　　古臣最近亦睇咗一本書，名曰《美股隊長》（吳瑞麟著），當中詳細介紹咗花旗股市嘅玩法。古臣留意到，最大市值嘅頭幾名花旗公司，大部分都係科網公司。當中包括：蘋果、
Ａｌｐｈａｂｅｔ（ＧＯＯＧＬ）、微軟（ＭＳＦＴ）、Ｆａｃｅｂｏｏｋ。呢幾間公司，過往十年升幅以倍計，最小升幅嘅微軟，都升咗近２倍，而Ａｍａｚｏｎ更加係升咗逾１３倍！鍾意價值投資法嘅朋友，相信喺花旗孖屐一定會好易成功搵到寶。
　　至於香江呢邊，長和（００００１）、恒生（０００１１）、會德豐（０００２０）、ＱＱ
呢十年間都有好大升幅，亦可算係香江版嘅價值投資股。嚟緊六月花旗有機會加息，阿臣怕近日花旗股市會回調，而香江呢邊嘅ＱＱ又不停破頂，阿臣都好怕自己摸頂。反而長和變返紅底股無耐，近日除咗淨之後落返貼近１００蚊水平，阿臣於是決定喺１００蚊至１０２蚊之間掛個盤買一手，希望佢可以追返落後啦！

　　表列截至５月１７日止投資組合表現：

　　組合淨值　　　　：現金７８８８８元
　　組合本月收益表現：＋　０﹒９％（截至上月底止組合淨值：７８１４８元）
　　組合累計收益表現：＋２１﹒４％（本金６５０００元）

想要獨家投資理財Tips？即Like etnet 全新Facebook專頁► 立即讚好