【開工大吉】同事利是好難逗？醒你5大必勝攻略！

　　話咁快就放完農曆年假，打工仔又要返到office報到，不過開工第一日又點會有心機做嘢吖，最重要梗係同身邊已婚嘅同事逗利是啦！即睇5大辦公室逗利是攻略！

 

1. 年初五千祈咪請假

 

　　開工第一日一定係最多人派利是嘅日子，所以年初五一定唔可以請假！年初五一定唔可以請假！年初五一定唔可以請假！（重要的事要講三次！）

 

2. 唔好帶飯

 

　　同年初五一定要返工一樣，開工第一日一定要多啲走動、見多啲人，咁先可以增加逗利是嘅機會嘛，所以咪匿喺自己個位度食飯啦！

 

 

3. 組團突襲

 

　　一個人走去腦細房逗利是有啲尷尬面懵？咁就要約多幾個同事一齊進攻啦！有時逗完腦細個封利是，仲可以「順路殺入」其他已婚同事嗰位繼續逗！三五成群行動嘅好處仲有，有時可以意外收穫到一啲你本來唔識嘅同事嘅利是！

 

4. 儲定一堆祝賀說話

 

　　想逗利是？梗係要講返幾句祝賀說話先啦！老老套套嗰啲「新年快樂」、「心想事成」、「出入平安」就咪講啦，講就講啲別出心裁嘅！例如「汪汪年！人旺旺！」、「大家好『狗』運！」、「狗年運轉幸運至」等等。

 

5. 面皮夠厚

 

　　講咗咁耐，其實逗利是嘅不二法門都係「面皮要夠厚」！正所謂禮多人不怪，趁新年主動多啲同同事講幾句祝福說話，本來就係一件好事，所以千祈咪怕醜！人哋會派封利是畀自己當然開心啦，就算冇都冇咩大不了！記住利是唔會係個天跌落嚟，唔開口一定冇機會！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇