2018-02-06Text: Yan Law
【打工仔至愛】父母生日假、運動假、失戀假……你最想要咩假期?
農曆新年就快到啦,打工仔終於可以放返幾日紅日休息下!不過,得個四日假又點會夠喉?如果可以嘅話,小編想放一世假!
(《衝上雲霄2》劇照)
1. 月事假
女仔一個月總有幾日因為「M到」而唔舒服,搞到返到工都無辦法專心做嘢,如果可以請返日「月事假」喺屋企抖抖,就真係perfect啦!其實「月事假」喺國際並唔罕見,日本、韓國、印尼更已經立法實行,至餘其他未有立法嘅好多地方如印度、意大利,甚至香港,都有唔少公司仿效推行「月事假」!
2. 寵物假
今時今日,寵物嘅地位可以話係比仔女有過之而無不及,所以有「寵物假」係一啲都不為過!就好似蘇格蘭啤酒商BrewDog就畀出咗一星期寵物假,曼徹斯特科企BitSol Solutions更有三個星期,而美國仲有至少四間公司有寵物喪假添!
3. 父母生日假/敬孝假
員工有生日假唔出奇,奇就奇在竟然有「父母生日假」(又或敬孝假)?!其實早喺十幾年前,澳門有間酒店為咗畀員工有時間為父母或者長輩慶祝生日,於是設立咗「敬孝假」,等佢地每年可享有兩日半假期嚟一盡孝道!
4. 運動假
雖然話做運動身體好,但打工仔日做夜做,仲邊有時間呀!計小編話齋,香港嘅公司應該要學下台灣某汽車用品店咁提供「運動假」,咁打工仔操fit個body之後,自然就更有精神返工啦!
5. 勤勞感謝日
原來日本有個以「尊貴勤勞、祝福生產、國民互相感謝」為宗旨嘅「勤勞感謝日」,意思係大家平時工作都辛苦啦,不如就放假一天吧!如果,小編話如果啊下,如果腦細有日行埋嚟小編個位度講句:「你辛苦啦,今日(如果係「聽日」會更加好!)就放假休息下啦!」咁小編就實在係太幸福啦!
6. 失戀假
失戀冇心機做嘢係非常正常,日本有間網路公司亦非常有心,為員工提供「失戀假」,畀佢哋可以喺屋企好好「養傷」!話說,最近有咁多男神/女神宣布婚訊,令不少粉絲心碎一地,唔知係咪都可以入紙請返幾日假呢?
7. 「想放就放」假!!!
想放假就放假?呢個簡直係所有打工仔嘅夢想!英國維珍集團喺2014年9月開始,就為員工提供無限放假福利!只要員工做好手上工作,按進度完成項目,就可以話放假就放假,而且唔駛上司事先批准!小編聽講,美國有1%嘅企業都實施咗無限假期,科技企業如Zynga、Groupon、Evernote通通榜上有名,其中Evernote嘅員工如果連續放假一個星期,仲會有額外1000美元津貼添!
【你點睇】巴黎奧運正式閉幕,今屆你感到最深刻的地方是?► 立即投票