2023-06-30
拍劇空檔結伴逛超市被捕獲 馮盈盈高鈞賢戲假情真?
【晴報專訊】馮盈盈去年情緒出現問題,拒絕北上拍劇並請假休息,現已回復最佳狀態,近日與回巢拍劇的高鈞賢(Matthew)合作新劇《逆天奇案2》,兩人首次合作,並在劇中飾演情侶。近日,有內地網民於深圳野生捕獲盈盈和Matthew,撇低劇組孖住逛超市,相中二人旁若無人,甜笑對望。盈盈喜迎新工作同時,莫非亦準備好展開一段新戀情?
盈盈與Matthew一起學滑浪。 (IG圖片)
正在拍攝《逆天奇案2》的馮盈盈和高鈞賢,日前在深圳某大型超級市場被捕獲,從內地網民拍得的相片所見,盈盈身穿白色外套襯黑色褲,手推放滿麵包、蛋糕及飲品的購物車;Matthew則短褲、踢拖,同樣一身休閒裝束打扮,附近未見有攝製隊。期間Matthew講話,氹得盈盈掩嘴甜笑,之後一起離開超市。有網民留言大讚二人合襯,更認定是情侶關係。
Matthew與盈盈開心逛超市,不停開懷大笑。(網上截圖)
翻查Matthew的社交平台,他在上月「520」當天,上載與盈盈出席《逆天2》活動的合照,更默契地派心心,Matthew又留言「開工有靚女陪伴」。Matthew早前亦分享了結伴學滑水的相片,素顏的盈盈露出纖腰十分搶鏡。二人密切的互動,難怪被傳撻着,Matthew昨日回覆本報時表示︰「嗰日我哋喺近深圳嗰邊拍劇,我架車可以揸返內地,咁我就帶佢去深圳食地道嘢,順便買啲嘢食返去畀劇組同事,我哋唔係拍拖,純粹係劇中情侶,當然盈盈係好女仔。(兩個約埋去滑水?)因為我哋有啲場口要衝浪,所以約埋一齊去學滑浪。」
Matthew主動幫忙搬食品,盡顯風度。(網上圖片)
為新劇相約學滑浪
盈盈跟Matthew同一口徑,她昨日回覆本報時稱︰「我同Matthew唔係拍拖,當日係同埋我女助手一行三人去超市,買零食返去慰勞劇組同事;我同Matthew因為拍劇先啱啱識,見到佢開工嘅時候,不單對我,對台前幕後所有工作人員都好nice,但係呢段時間我只想專心工作,專注自己事業,所以我暫時無任何談戀愛嘅想法。」
轉載自: 晴報
【你點睇】本港無人駕駛自動車最快本月底試運,你會否乘坐?► 立即投票