10/07/2024 15:22
《樓市亮話－湯文亮》只要有一個條件，樓價下半年不會下跌
《樓市亮話》今年即使在年初時撤辣，但樓價仍然下跌３％，大部分專家都認為今年樓價仍然會下跌，幅度大約５至１０％，傳媒話有玄學家８年前已經預測得到，當時玄學家話，２０２４年區區都唔旺，判了香港死刑，其實，玄學家意思是２０２４年之後香港才轉弱，而事實上到了２０２４年，香港樓價已經比高峰時下跌了２５％，如果繼續下跌，咁樣就真係大件事，嚴格來說，玄學家的預測不算準確，甚至他自己都不信自己，既然話２０２４年之後區區都唔旺，點解在兩年前買了一幢小型商業樓。 我認為只要有一個條件，樓價下半年不但不會下跌，甚至不跌反升，有人話唔使問阿貴，一定是減息，如果美聯儲局開始減息，樓價就唔會下跌，老實說，這個可能性非常之高，但主動權不在香港手裏，拜登傻傻戇戇，唔知道減息是競選連任的一大優勢，遲遲唔肯減息，現在民調比特朗普拋離，就算減息作用亦不大，甚至唔減好過減，或者會有意想不到的收穫。 有人話，只要銀行唔ｃａｌｌ ｌｏａｎ，樓價就不會下跌，其實，銀行只是向商業物業，或者持有多個住宅單位的業主ｃａｌｌ ｌｏａｎ，並沒有向只有一個自住單位，而又準時還款的業主ｃａｌｌ ｌｏａｎ，但住宅價格仍然下跌，所以，唔ｃａｌｌ ｌｏａｎ這個條件對樓市影響亦不是咁大，不會因為銀行唔ｃａｌｌ ｌｏａｎ令樓市不跌甚至反升。 有很多人不明白，在過去２０個月，租金差不多個個月都升，而樓價只是在撤辣後有一陣虛火，但亦只不過升了兩個月，其他時間全部下跌，租金升，樓價跌是一個反常現象，其實，很多租客都有打算買樓，但銀行唔做按揭，他們唯有暫時租樓住，所以一個條件就是如果銀行在下半年願意借錢俾人買樓，不少現在租樓的人就會買樓，多了人買樓，樓價自然會上升。《紀惠集團副主席及行政總裁 湯文亮》 ＊《經濟通》所刊的署名及╱或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。