28/08/2024 17:00
《小傳日記》拼多多插完水又輪到農夫山泉,首富之位真係唔老嚟?
《小傳日記》農夫山泉中期業績公布後,今日股價一度急挫近一成三,收市跌幅收窄,但仍跌一成,報27﹒05銀,不過大股東鍾睒睒首富之位暫時仍保得住。兩日前,鍾睒睒先由拼多多創辦人兼大股東黃崢手上,重新奪回中國首富之位。 近年中國首富呢個寶座歸屬算係比較穩定,自2021年至2024年8月初都一直由鍾睒睒蟬聯,但今個月初,情況出現變化。根據彭博8月8日億萬富豪即時排行榜,拼多多創辦人兼大股東黃崢身家達486億美元,比鍾睒睒當時474億美元身家多出12億美元,以些微優勢奪得中國首富之位。 話雖如此,黃崢之所以能奪得中國首富之位,其實都係因為鍾睒睒今年身家大縮水。根據彭博數據,今年直到8月8日為止,農夫山泉股價累跌33﹒9%,鍾睒睒身家縮水203億美元。而同期拼多多股價累跌5﹒2%,黃崢身家亦減少29﹒2億美元。結果,首富之位四年來首次換馬。 不過事件峰迴路轉。由於拼多多第二季財報不如預期,其美股ADR在8月26日急挫28﹒5%,市值降至約1858﹒3億美元。據彭博26日億萬富翁指數顯示,黃崢身家單日蒸發141億美元,在中國富豪榜上跌至第4位,身家剩返352億美元。僅僅相隔十八日,鍾睒睒就以500億美元身家回歸中國首富之位。第二位係騰訊(00700)創辦人兼主席馬化騰,身家442億美元,第三位係字節跳動創辦人張一鳴,身家422億美元,而阿里巴巴(09988)創辦人馬雲排第五,身家約336億美元。 講起中國首富,傳聞好多富豪聽到都怕怕,皆因覺得首富「唔老嚟」。之前有首富因投資衍生工具錄得巨虧,亦有首富身陷囹圄,坐監嘅先後唔止一人,而輪到馬雲做首富時,疑因一時失言,導致螞蟻集團招股半途被腰斬,阿里無法涉足互聯網金融。 至於「現任」首富鍾睒睒今年亦是非不斷,喺宗慶后離世後,被挖出當年同娃哈哈之間嘅恩怨情仇,繼而有產品被杯葛。之後又發生旗下茶飲產品包裝含日本元素遭到杯葛,將農夫山泉再次推上風口浪尖。當大家以為一切都歸於平淡時,又發生香港消委會將農夫山泉嘅飲用天然水以礦泉水嘅標準測試。結果農夫山泉更要向消委會發律師信,要消委會澄清和道歉。據媒體報道,農夫山泉執董更親自帶同律師到消委會總部,並聲言消委會若不道歉,必定追究到底。最終消委會為農夫山泉飲用天然水獨立歸類。但事件影響有幾深遠,相信要下半年業績出咗先知。 香港有句俗語「人怕出名豬怕肥」!係唔係受首富盛名所累,而令農夫山泉一次又一次捲入漩渦,就不得而知啦。筆者唔係迷信之人,亦唔鼓吹迷信,有時啲嘢可能就係「剛剛」遇上「啱啱」。請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。