21/08/2024 16:46
《小傳日記》新冠清零聽得多,原來買內房股都要做好清零準備!
《小傳日記》港股正值業績期,已公布嘅業績唔少都好過預期,賺多咗,股價又唔一定跟住升,一陣又話呢上半年賺得多,下半年又唔一定繼續咁好景。所以,做上市企業老闆或高管都真係唔容易。 內房板塊雖然大部分仲未放榜,但真係唔好有任何幻想,尤其係民營房企蝕少當贏。好似融創中國(01918)咁,今日發盈警,預期上半年蝕150億人仔,比舊年同期蝕少3﹒7億人仔,大致上「保持水準」。但另一房企雅居樂(03383)就預期,上半年蝕多一倍以上,最多蝕98億人仔。不過,股價今日反應唔大,輕微跌2%左右。或者市場一早已經預咗。所謂禍不單行,噚日就有本地傳媒報道,話雅居樂持有嘅英皇道同柏架山道交界一幅住宅地皮被接管人出售,反映其流動性壓力持續增加。 同樣係噚日,另一內房企富力地產(02777)集團全資附屬公司富力香港被呈請人在高等法院提交清盤呈請。呢次已經唔係第一次,就喺上個月,富力全資附屬兆晞就已經收到清盤呈請,並排期於9月25日在高等法院審理。唔止富力,內房企前龍頭中國恒大(03333)年初被提交清盤呈請,然後停埋牌。既然龍頭企業都可以被提清盤、被停牌,中小房企又點會例外?相信呢類清盤呈請只會愈來愈多。 另一房企前龍頭碧桂園(02007),今年2月被債務人向高等法院提出清盤呈請,追討16億銀未支付定期貸款及利息。之後,又因為推遲2023年業績公布而喺4月2日起停牌,至今已停牌4個幾月。停牌前股價只得4毫8仙半,比起2018年1月股價高峰期15﹒9銀(除淨後)股價已經跌左97%。碧桂園風光時,以2019年為例,入帳營收接近5000億人仔,純利將近400億人仔。 自從內房債務爆煲後,碧桂園形勢急轉直下。到2023年上半年,虧蝕金額高達489億人仔。而家人哋公布緊2024年上半年業績,佢居然連2023年度業績都未公布,又真係誇張咗啲。由於碧桂園復牌之路遙遙無期,內地有基金公司早前索性將旗下基金持有嘅碧桂園股票按照0港元進行估值,實行「清零」計劃。所謂長痛不如短痛,清零都好嘅,唔使個心梗住梗住,清左零之後,日後若果意外復牌,咪當中咗六合彩囉! 由於內地樓市至今未有止跌回升嘅跡象,債務問題仍未露曙光,唔排除日後有更多房企被提交清盤呈請,甚至停牌,以至於更多基金要做清零行動。所以,買賣民營內房股真係要打醒十二分精神,要做好隨時被清零嘅準備!請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。