07/08/2024 17:02
《小傳日記》奧運如火如荼，李寧股價卻見四年低，內需變內衰？
《小傳日記》四年一度嘅體壇盛事－奧運會正在巴黎舉辦得有聲有色，本屆奧運會有好多比賽場地設喺各大名勝景點附近，睇賽事之餘，都可以順便欣賞一下花都美景，值得一讚。至於各項比賽過程同結果，同樣引人入勝，仲充滿話題性。例如女乒個人項目，代表盧森堡嘅６１歲婆婆級選手倪夏蓮，同國家隊２３歲孫穎莎嘅「婆孫大戰」就引來熱話。而該項目總決賽時，陳夢戰勝孫穎莎奪金，場內部分中國球迷嘅過激行為，同教練嘅表情，就喺內地引起一場巨大嘅迴響。呢件事餘波未了，據報內地有人涉嫌在社交平台詆毀某運動員而被捕，同時，有多個發表過激言論嘅社交帳號更被禁言。 除咗呢啲熱話，本屆奧運比賽過程同樣緊張刺激，未到最後一刻都唔知鹿死誰手。比如排球比賽，國家女排同土耳其女排打足五局最後飲恨，八強止步。日本男排對戰意大利男排嗰場比賽更加峰迴路轉，日本隊先勝兩局，並且喺第三局領先意大利２４比２１時，只差一分就完成直落三局擊敗意大利，進入四強爭獎牌。點知偏偏關鍵一分攞唔到，畀意大利連追幾分打到刁士，之後大逆轉，意大利以２７比２５贏咗呢一局，跟住再贏埋之後嗰兩局，總局數３比２反勝日本隊，躋身四強，令人意想不到。 過往每逢有體壇盛事，莫講話奧運會，就算係亞運會，體育用品股都會趁機炒作一下。但今屆奧運會已經舉辦得如火如荼，幾隻體育用品股股價就依然無起色。除咗因為星期一發生亞太股災拖累股價之外，其實幾隻體育股本身都積弱好耐。好似李寧（０２３３１）咁，星期一股價創下四年低見１２﹒８８元。即係低過上屆東京奧運。又難怪嘅，內地經濟增長放緩，社會消費疲弱，同內需相關嘅餐飲、啤酒股，股價呢兩年都不斷尋底。體育用品股又點會例外？唔通而家真係內需變內衰？咁又未必！上月安踏體育（０２０２０）公布第二季營運數據，安踏品牌零售額仍然錄得高單位數增長。 不過，同行業務有增長，又唔等於李寧都有增長。雖然李寧未有公布中期業績，但以舊年為例，同行安踏，特步（０１３６８）和３６１度（０１３６１）年度營收都錄得雙位數百分比增長，唯獨李寧得單位數增長。至於年度純利，三個同行按年都有增長，只得李寧倒退，仲要倒退超過２１％。李寧近年動作多多，舊年底先以２２億銀買入商廈，今年３月公布業績前後，又咁啱傳出私有化。件事最終當然不了了之，不過係分薄咗純利倒退呢個焦點。其實，如果李寧肯花多啲時間發展本業，例如利用海外較高啲知名度，開拓外銷市場，分散內地市場風險。就算遇到內需疲弱時，都唔使擔心內需變內衰啦！請請！ ＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。