02/08/2024 11:34
《魚缸博客》美股大跌港股冇行,咁環境博客都投降!
《魚缸博客》尋晚美股三大指數大跌,市場歸因美國經濟數據差過預期,擔心經濟衰退。其實,美國經濟衰退訊號已經出現咗幾年,但因為AI熱潮而忽視咗。最早嘅訊號係美債孳息曲線倒掛,但時間耐咗,美國又唔見出現經濟衰退,投資者懶理。除此之外,美國零售銷售同信心疲弱、信用卡數拖欠情況增加,都係衰退訊號。 今年4月下旬開始,英偉達股價持續走強,推動納指升勢進一步加速,已經升得過火,本來就有調整壓力,而拜登同特朗普嘅首場電視辯論,好似摑醒咗投資者,原來拜登已經老成咁,未來點去治理國家?特朗普遭到槍擊死唔去,更令佢嘅支持度大升。「賀女士」即使代拜出征,我相信都影響唔到特朗普再次當選! 不過,大家發現,之前氣勢如虹嘅英偉達唔再創新高,反而掉頭下跌,已經知唔對路啦!鮑威爾喺星期三嘅聯儲局議息會後,又暗示9月份好大機會減息,但市場又突然擔心經濟衰退,所以個股市跌。經濟衰退,減息咪做啱囉,所謂擔心衰退,根本就係炒家趁高拋售股票嘅藉口,啲散仔先會俾大戶帶住走,到某個時間,新聞必定會報:「美國經濟表現穩定落嚟,聯儲局維持低利率有利經濟復甦」!到時美股又會再升過。 港股呢邊冇咩好講,恒指7月24日已經失守250天線,如果你相信呢條係所謂牛熊線,咁即係港股已經跌入熊市,仲買貨?!香港以至內地經濟環境冇得同美國比,美國減息,我地有幾受惠?!因為大家嘅資產質素完全唔同,人地買微軟、蘋果同英偉達,我地都得,買Win10、iPhone同買部內置英偉達晶片嘅電腦囉!咁嘅環境,博客都要投降! 《編者按》本欄搜羅即市傳聞,惟消息未經證實,《經濟通》亦不保證內容之準確性。