29/07/2024 09:43
【巴黎奧運】精彩賽事預告-何詩蓓打入決賽
《經濟通通訊社29日專訊》巴黎奧運於上周五(26日)揭幕後,香港於巴黎奧運的首面金牌由重劍選手江旻憓奪得,接下來重點賽事如下: 1.港隊「女飛魚」何詩蓓於200自由泳準決賽,游出成績1分55秒51,於總成績位列第四,並將於香港時間周二(30日)凌晨3時41分挑戰個人第三面奧運獎牌。 2.另外,女子100公尺仰式將於今日下午5:16分舉行,本港派出歷來達到奧運A標的最年輕香港泳將張心悅出戰。 3.羽毛球方面,港隊女雙組合楊雅婷楊霈霖,於小組賽擊以以局數2:1敗美國,港隊現時小組兩戰一勝一負,最後一場分組賽將會對戰國家隊組合。 4.男子乒乓球64強,本港派出世界排名11的黃鎮廷出戰,預計首場比賽將會對戰塞內加爾的易卜拉希馬.迪奧;而混合雙打則由黃鎮廷及杜凱琹聯手,對戰北韓的金琴英與李鄭息。(ul)
04/09/2024 17:15
《小傳日記》消費降級內需變內衰?Prada賣貴嘢業績卻唔衰
《小傳日記》普拉達(01913)股價今日最多跌近一成至48﹒55銀見半年低,之後有所回升,收市只跌2%,報52﹒55銀。股價今早之所以跌咁多,據報因為旗下品牌Miu Miu首席執行官Benedetta Petruzzo將跳槽LVMH集團旗下Christian Dior Couture,出任董事總經理,將於10月15日生效。 Benedetta Petruzzo於2020年加入Prada,主要負責普拉達旗下增長最快嘅品牌Miu Miu。一個CEO跳槽,點解對股價影響咁大?皆因Miu Miu而家係普拉達銷售增長引擎。論銷售淨額,Miu Miu今年上半年只佔集團總銷售淨額23﹒4%,但期內銷售增幅高達85﹒9%,遠遠高於Prada品牌同期2﹒4%嘅增長率。一旦有乜嘢風吹草動,隨時影響成個集團下半年嘅業績,難怪市場今早有咁大反應。 一個高層人事變動,係唔係會導致一個集團銷售大跌?我諗應該又未至於,除非主要設計師拉大隊跟住走人,對品牌嘅衝擊或者要重新評估。 翻睇普拉達集團中期業績,上半年總銷售按年錄得14%增長,包括中國在內嘅亞太區錄得按年增長8﹒2%,而中國市場銷售額錄得中個位數增長。 奢侈品上半年在中國竟然錄得銷售增長?呢個事實可能有啲顛覆孖屐想象。皆因呢大半年,一直聽到報道話內地零售銷售疲弱,消費降級之類。原本一杯20至30人仔嘅茶飲,要減半至9﹒9人仔先有人吼,飲用天然水一支平均要減到八毫子人仔先有人要,就連機票都要鬥平,搞到內地三大航空扭虧無期,半年埋單都要慘蝕。所以話內地消費降級,一啲都無誇張。 當然,你可能會話Prada係奢侈品,有佢嘅獨特性,其他品牌難以取代,不過咁都要有錢有消費力先得㗎。除咗普拉達上半年中國市場錄得增長,LVMH首席財務官吉奧尼都講過,就算亞洲市場(不包括日本)第一季度銷售收入按年下跌6%,但中國消費者喺第一季對LVMH時裝和皮具嘅收入,按年仍然增長10%,證明內地居民嘅消費力依然強勁,消費得起奢侈品的有錢人仍然有唔少。 只不過呢種消費力可能愈來愈兩極化,喺經濟放緩嘅大環境下,愈來愈多中產階層要消費降級,甚至向下流動改揸網約車送外賣,所以呢兩年好多內需股股價跌到殘,內需變「內衰」。但Prada就輕輕鬆鬆示範一個華麗轉身,無放下身段同你鬥平,銷售額唔單止無衰到,仲錄得增長添!請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。