15/07/2024 17:04
《小傳日記》疑似洗米華發公開信!呢個時勢嚟出會唔會太急進?
《小傳日記》三中全會今日開幕,但直到A場收市都未見有咩重大好消息,所以魚缸三點打後都跌多咗,守咗全日嘅18000關都喺下晝再穿過,收市險守該位,唯有再睇吓後有咩好消息啦。就趁三中全會召開之際,竟然有人喺監獄入面拋出橄欖枝? 又名「洗米華」嘅周焯華喺今年初正式被裁定「創立及指揮犯罪集團」同「不法經營賭博」等合共162項罪名成立,判處監禁18年。而呢半年嚟,雖然洗米華鋃鐺入獄,但兩位伴侶依舊過得風光而且高調,似乎有意要話畀大家聽雖然洗米華人在牢中,但在外嘅家室依舊有頭有面。 18年監禁期過咗十分之一都未夠,但洗米華疑似已經蠢蠢欲動有東山再起嘅諗法。記得當時庭上洗米華對各種指控都不置可否,更加豪言「唔知道點解會變成犯罪集團或者黑社會」。雖然最終罪成,但豎立自己係「殷實商人」嘅形象係從來不變。就喺啱啱呢個周末,太陽城集團嘅Facebook專頁時隔接近三年以來第一次更新,出咗個疑似係公開信嘅post,再配上一幅洗米華喺「太陽城集團」背景前演講嘅相。 呢封疑似公開信之所以「疑似」,因為封信並無上款同下款,嚴格嚟講係唔知邊個寫畀邊個同幾時寫嘅,但信嘅開頭有問候,而且口吻都好似寫畀熟人咁親切。信中開頭就提到「很久沒見……一眨眼就兩年多了」,難免就令人聯想起洗米華由被扣押到入獄至今嘅呢段時間。隨後重點就嚟,提到喺呢段時間入面,「有時候我會問我自己,我真的做錯了嗎?對澳門,我問心有愧嗎?」間接講明覺得所作所為都係無愧於澳門。之後信入面強調「我」喺澳門生於斯長於斯,「我的根就在澳門」,然後就羅列一堆自太陽城成立以來對於澳門文娛事業嘅貢獻,包括參與過50個大型演唱會,又贊助過格蘭披治大賽車、國際電影展等,而公益方面都係不遺餘力等。信到最後就強調,為澳門付出咁多,全因為「我真的很愛這個地方!」。 魚缸周不時都會有上市公司老闆用自己署名出公開信,通常出得公開信,口吻都係好似上面呢封咁親切無比,目的就係動之以情,但通常都係衰嘢發生嘅時候,例如大規模炒人或者內房畀唔到債息咁。今次呢封都大有機會出自公關之手,呢點大家都唔會唔知,但更重要係揀喺三中全會前出,時間點上絕對唔會係巧合,喺阿爺嘅重要場合前出,更加令人有兵行險著之感。洗米華係已經被定罪嘅人,阿爺討厭非法賭博,更討厭疑似走資行為,太陽城呢個時候爭取曝光,難免令人覺得喺大好時候「觸霉頭」嘅感覺。 信一出,澳門政府會睇到,阿爺會睇到,大眾會睇到,各方都可以有自己解讀,但有咩感受就未必一樣。信入面提到太陽城對澳門嘅貢獻,所講嘅嘢假唔曬,但問題係背後嘅操作係容易觸碰上面嘅神經。如今洗米華一直想淡化在暗嗰面,強調在明嗰面,對於法落佢坐監嘅澳門政府著實係尷尬。今次出信原因唔知係咩,若然話要令太陽城集團翻身都尚有啲機會,只要洗米華本人並唔直接參與其中,但要令佢本人提早釋放相信就有難度,始終罪成162項,18年只可以算係唔長唔短,而且而家一年都未夠,好難話放就放。始終今次係第一封信,如果太陽城有咩目的想達成,相信都仲再出多好多封信先得,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。