【又有投訴】帶著委屈去開工？盤點10個經常被人罵的職業
#職場 #打工仔 #心理情緒雖然男神黃子華講過，「老闆畀份人工你，一半係畀你做嘢嘅，一半係畀你受氣嘅」，但打工仔每日返工做到成隻狗咁，仲要受腦細氣、受客人氣，搞到條氣成日chok住chok住咁，都咪話唔陰公。
（截圖自《棟篤神探》）
即看自己份工有沒有入圍「10個最常受氣的職業」啦！
第10位：司機
無論係巴士司機、小巴司機，定係的士司機，十個有九個都一定試過畀乘客投訴，甚至指著嚟大鬧，理由不外乎以下幾個：班次不準、態度不佳、過站不停……雖然有部分行為的確係司機嘅人為過失，但大家鬧之前都不妨停一停、諗一諗，其實路面交通情況，例如塞車，都會好影響行車速度和時間，呢啲就唔係司機可以控制嘅範圍！
（截圖自《我只是個計程車司機》）
Read More：【打工仔哀歌】2019壓力最大的十大職業排行，你份工上榜了嗎？
第9位：老師
雖然好多人認為老師係受人尊重嘅高尚職業，但今時今日做老師，除咁要對學生負責之外，仲要處理埋教學以外嘅校務、應付直升機家長嘅無理要求……如果一覺唔覺意做漏咗少少，或者做錯咗少少，下場只有一個，就係被校長鬧到一臉灰、被家長投訴到一肚氣！
（截圖自《教束》）
第8位：律師
律師都會成日被人鬧？當然，尤其係個啲為干犯重大案件嘅犯人辯護嘅人權律師，皆因喺一般人眼中，犯咗重罪嘅人即使被判死刑亦都係死不足惜；但人權律師卻會為咗維護和保障犯人嘅人權，避免佢哋受到酷刑和其他形式虐待而據理力爭，結果好易被人以有色眼光看待，甚至遭到辱罵。
（截圖自《我們與惡的距離》）
第7位：醫護人員
雖然大家都好明白醫護人員嘅工作壓力大，休息時間又唔多，但所謂人命尤關，醫護人員嘅工作從來都係被嚴格看待，容不下一絲一毫嘅犯錯機會。偏偏近年香港不時發生醫療事故，令病人承受不必要嘅傷害，咁又好難怪愈來愈多人（尤其係涉事病人同家屬）批評醫院醫護人員工作不專業和不人道。
（截圖自《白色強人》）
第6位：客戶服務員
身處香港呢個投訴之都，走喺最前線嘅客戶服務員絕對係捱得最多批評聲音嘅人。皆因唔少客人都會因為覺得冷氣唔夠大、見到地下有灘水、搵唔到指示牌，甚至行入門口個陣冇人同佢講早晨……有理冇理，都會走去櫃台度投訴咗先！
（截圖自《假面酒店》）
Read More：【拒絕社畜命運】無人有權對「欺壓」沉默！打工仔5步應對職場霸凌
第5名：媒體從業員
一個專業嘅媒體從業員，尤其係從事新聞報道，應該係要保持中立、客觀、持平嘅工作態度。偏偏香港各個媒體都擁護著不同嘅政治立場，喺整合及傳遞資訊時或會大肆渲染、加油添醋，或胡亂捕風捉影，觀眾睇完覺得有偏頗自然會破口大罵，甚至喺網絡上用文字攻擊媒體公司，或者記者。
（截圖自《導火新聞線》）
第4位：藝人
做藝人，尤其係知名度高嘅，大眾對佢哋嘅道德要求往往都會更高，所以成日都要規行矩步、小心說話，以免落人口實。但其實就算佢哋冇行差踏錯，有時只不過係講出咗自己心中嘅真實想法（最常見係表達政治取態），都好容易會被粉絲因偶像唔符合理想形象而心生討厭，繼而作出侮辱性或人身攻擊言論，甚至惡搞改圖嘲諷。
（截圖自《愛·回家之開心速遞》）
第3位：警察
警察係一個用生命去守護市民嘅職業，但由於近年香港政治氣氛緊張，社會上更呈現出撕裂狀態，負責維持社會治安嘅警察經常被推上風口浪尖，企喺不同政見嘅市民之間，甚至係政府和人民之間；尤其喺遊行示威活動期間，警隊嘅執法方式更經常受到市民質疑，因而被指責未有謹守政治中立嘅原則，甚至招來唔少市民嘅謾罵和羞辱。
（截圖自《鐵探》）
第2位：議員
議員被指罵從來都唔係新鮮事，尤其當佢哋發表咗一啲唔啱市民心水嘅言論或者發展方案時，更會被鬧得更加嚴重。不過呢種鬧係合理嘅，畢竟大部分議員都係由民選產生，當然係要為民發聲，而唔係為自己謀福利啦。
（截圖自《選戰》》）
第1位：特首
特首作為最高官位，一言一行當然備受眾人注目，亦理所當然成為最易被人鬧嘅一個人。所謂高處不勝寒，如果想坐穩呢個位，最重要一定係要以民為主，凡事都將市民嘅利益放喺第一位，一旦有咩決定或者政策做得唔好，就要抱著「錯就要認，打就企定」嘅心態，勇敢企出嚟承擔，切忌龜縮，咁先可以贏得市民尊重！
（截圖自《選戰》）
Read More：【相嗌唔好口】與同事意見不一怎麼辦？教你4步解決職場紛爭