【聖誕節梗係要咁過】好玩VS有意義！盤點「6+1」種打工仔放假日常
#職場 #打工仔 #聖誕節 #Christmas2018雖然距離聖誕節仲有成一個月有多，但因為11、12月都唔會再有其他紅假，所以唔少「長期望放假」嘅打工仔都已經將全副盼望放喺聖誕假度，密密計劃緊一個最完美嘅聖誕假期。今個聖誕你又諗住點過？即睇「6+1」種最常見嘅打工仔放假日常啦！
1. 豪食N餐
等咗咁耐先又有得再放假，梗係心情大靚兼胃口大開啦！更重要嘅係，喺聖誕呢個普天同慶嘅日子，好多餐廳都推出咗各式各樣嘅聖誕自助餐、聖誕大餐、聖誕限定餐單，所以好多打工仔都會約定屋企人、另一半或者一班死黨，一齊去「擦」返餐勁！
（截圖自《天龍八部》）
2. 北上揼骨
返工日捱夜捱，唔單只精神差，仲捱到腰痠背痛添，難得有幾日假，梗係要北上揼骨鬆一鬆（順便飲杯喜茶，再食埋椰子雞、探魚、牛肉火鍋、海底撈、串燒……正啊）！
（截圖自《骨妹》）
Read More：
3. 去Wild camp
小編發現，近年多咗好多打工仔放假去wild camp，一嚟可以親親大自然，二嚟其實係想搞搞新意思（次次放假都係去行街、睇戲、食飯真係好悶）！搵個環境優美嘅地方，畫界起營，再喺一大片天空下（或者星空）hea返陣，或者同情人、三五知己摸下酒杯底、玩下煮飯仔，的確係一件樂事！
（截圖自《太陽的後裔》）
4. 大瞓特瞓
平時積落一大堆睡眠債，最啱就係放假時一次過清晒佢。尤其聖誕節呢啲大日子周街都係人，與其同一班人喺條街度玩「擠擠樂」，不如留喺屋企同「周公」大被同眠仲好！
（截圖自《當你沉睡時》）
5. 去旅行
對唔少香港人嚟講，放假就等同去旅行！（小編有朋友仲話，唔係啲年假要嚟做乜！）雖然今年聖誕假喺星期二、三，但只要請埋星期一、四、五，就可以連放九日！唔夠喉？咁一於埋下個星期一（12月31日），連住元旦一次過放足十一日，都咪話唔爽！
Read More：
【走到世界邊端】徹底逃離工作！5個不為人知的「打工仔避世天堂」
【打工仔至愛】父母生日假、運動假、失戀假……你最想要咩假期？
6. 在工作中度過
放假可以休息下當然爽啦，但其實有唔少打工仔喺呢段時間都要默默工作，真係聞者心酸，見者流淚。所以小編要喺度向一眾盡忠職守嘅打工仔致敬，包括飲食業從業員、清潔姐姐、公共交通工具司機、紀律部隊……（至於一班成日喺度唱「聖誕我注定一人」而諗住返公司OT嘅打工仔，小編只係可以奉勸一句：要及時行樂呀！）
（截圖自【就是要你知】一 個 人 的 聖 誕！未！驚！過！＠Arm Channel TV）
7. 傳遞愛
每年臨近聖誕，各式各樣以聖誕為主題嘅商業活動都蜂擁而出，好易令人忘記聖誕節本來係一個有關「愛」嘅節日，所以唔少打工仔都寧願參加報佳音、派飯、捐贈寒衣等活動，希望可以過個有意義嘅聖誕節！而無論你諗起嘅係聖誕老人（為全世界嘅好孩子分送禮物），定係耶穌（擔當世人嘅罪而釘死喺十字架），不妨都趁住呢個普天同慶嘅日子，向身邊人（或者任何人）表達愛同關心啦！
（截圖自《哈利波特》）