【Office Green Check】同事笑我太瘋癲？任何人都可做到的「環保9式」
#職場 #打工仔 #OL #環保生活 #辦公室貼士環保？講就容易，做好難。尤其當身邊人唔願做嘅時候，仲要一句飛埋嚟：「多餘，無用㗎」，更加會令人覺得沮喪。不過小編始終相信，要成大事，就要由小事做起；要改變一班人嘅行為，就要由自己做起。就算「同事笑我太環保」都好，都要堅持初心，喺日常生活中努力「Go Green」，所以今次為大家送上一張「打工仔環保9式」清單，不妨一齊試下！
1. 減少購買衣服
「衣」作為「衣食住行」嘅大佬，今次一於由「買衫」講起啦！
開港有話「先敬羅衣後敬人」，唔少打工仔（尤其需要見客個班）為咗保持形象，總會密密買衫；加上近年網購成風，只要Click幾個掣，就可以安坐家中買到平靚正嘅衫褲鞋襪，難怪國際環保組織綠色和平喺2016年做嘅一個衣櫃調查中發現，20至45歲港人平均擁有94件衣物（不計內衣和鞋襪）！
但最令人驚訝嘅調查結果係，香港男性平均有77件衣物，但當中有10件係從未著過或著少過兩次。港女更誇張，每人平均擁有109件衣物，但竟然有20件係未著過或著少過兩次！所以計小編話，與其買得多，不如買得好，仲要學識埋mix & match，咁就同一件衫都可以著出唔同效果，仲可以為環保出一分力添！
Read More：
2. 堂食／自備餐盒買外賣
講完「衣」，梗係要講「食」。雖然唔少打工仔會為咗慳錢（或者減肥）而帶飯返工，但落街食飯嘅人始終佔大多數。想食得環保？梗係堂食啦！但打工仔做起嘢上嚟分秒必爭，唔想嘥時間等位，好多時都會選擇買外賣，所以去到呢個時候，最好就係可以自備食物盒同餐具，仲要同飲管Say No！
小編收到風，最近政府聯同大家樂、大快活和美心搞咗個「走塑」環保獎勵運動，鼓勵減少使用塑膠餐具，只要大家喺呢三間連鎖快餐店買外賣而唔拎塑膠餐具嘅話，就可以換印花；儲夠六個印花（同一間快餐店品牌），便可以換一套可重用餐具，或一杯熱飲。呢個活動將會喺11月16日開始，暫時為期兩個月。
3. 踩單車／乘搭公共交通工具
香港嘅交通網絡發達，巴士、小巴、的士幾乎招手可得，所以如非必要，大部分打工仔都會選擇搭公共交通工具返放工。但如果你怕地鐵故障、怕巴士塞車嘅話，不妨考慮下踩單車返工？當然前提係，首先你要有一部單車，再嚟係公司唔可以離屋企太遠（起碼件事要係work先得），仲要有足夠嘅體力同毅力……
立法會議員姚松炎、fb專頁Rideout及Bike The Moment曾發起「天光Ride」活動，藉此提倡在市區以單車代步返放工。（天光Ride@Fb）
4. 盡量使用紙張的兩面
無論打咩工都好，都總係會用到紙。老套啲都要講返句，可以唔用紙嘅話就唔好用喇（改用電子方式發放訊息，或者利用傳閱方式代替複印副本）；到非用紙不可嘅時候，最好就揀用再造紙或FSC認證生產嘅紙張，記得要用盡紙嘅兩面呀！
5. 使用月經杯
每個女人，一個月總有幾日寧舍唔方便。之但係作為一個「在職貧窮」嘅打工仔嚟講，請假留喺屋企休息實在太奢侈了（除非公司有月事假啦），如果唔係都係要揜住個肚頂硬上。
雖然個人攰奶奶、個肚仔唔舒服係在所難免，但嚟M最麻煩嘅係，要時不時匿入廁所處理下條M巾。（可能有啲人會話，有冇咁誇呀，換條M 巾都係幾分鐘啫！但對「地球伯伯」嚟講，分解一條即棄M巾要用成500年時間㗎）所以近年多咗唔少OL選用月經杯，貪佢方便（一般使用8-12個鐘後才需要拿出來清洗消毒）之餘又環保（一個月經杯最長可用10年，仲可以慳返買M巾嘅錢）。
6. 減少開冷氣
無論夏天定冬天，好多公司為咗空氣流通，總係會長開（甚至大開）冷氣，唔少打工仔更因為咁而投訴「公司長期凍到似雪房」，而且非常唔環保！都係同一句老套嘢，唔用嗰陣記得要熄電掣（其實收工前半個鐘都可以熄定部冷氣先），仲有記得每月至少洗一次隔塵網，確保冷氣機可以有效咁運作，既慳電又衛生。
Read More：
【2030世界末日】地球進入危險期！除了吃喝玩樂外，認識氣候變化
7. 放工熄電腦
唔少打工仔都有個習慣，就係為咗第二朝返到公司可以即刻用電腦，收工嗰陣都會選擇「睡眠」而唔係「關機」。雖然「睡眠」模式嘅耗電量都算偏低，但既然搞環保，就要將環保進行到底，直接將電腦關掉！
8. 收集和回收廢物
成日講「環保4R」，除咗上面提到嘅「減少使用（Reduce）」、「物盡其用（Reuse）」和「替代使用（Replace）」之外，當然唔少得「循環再造（Recycle）」啦！大家係時候喺office整返個「私伙回收箱」，收集自己同埋身邊同事用完嘅廢紙、金屬罐、塑膠品、玻璃瓶等可回收物料，方便一次過拎去回收再造！
9. 將廢物「升呢」做藝術品
平時買嘢儲落咗一大堆單據，又唔想就咁丟咗去咁唔環保？咁就要發揮小創意，將單據貼上牆，成為另類「連儂牆」，然後將佢哋命名為「女同事們的卡路里」（買珍珠奶茶嘅單）、「美到讓人掉下巴的女同事們」（買新衫、買化妝品嘅單）等，富趣味之餘仲非常有警惕作用添！