【奉旨幫你？】錯在「太好人」！6招向同事say “NO”的技巧
#職場 #上班族 #拒絕 #人際關係 #辦公室貼士辦公室你幫下我、我幫下你其實好正常，但遇上「無賴同事」，有嘢冇嘢都叫你幫手，真係火都嚟埋；面對同事嘅「請求」，內心一定反晒白眼，喺心入面大叫︰「乜都幫你做晒，出埋你份糧好唔好！」但知曉辦公室「人情世故」嘅小薯，當然唔會咁做；為免得罪同事，唯有展露「公式笑容」，默默地say “YES”，接收埋人哋嘅工作，陷入無盡嘅工作輪迴……
其實，最簡單嘅方法，當然係say “NO”，但係呢兩個字母邊有咁容易講出口，咁就試下用其他方法，迂迴地「拒絕」同事！
（《假裝熱情》劇照）
第一招︰保持沉默
面對同事嘅要求，你唔作任何回應，保持沉默，佢哋或者會問多幾次，只要你堅持唔回應，佢哋就會自討沒趣，唔再搵你；千祈唔好衰心軟，覺得會顯得自己好無禮；如果你真係好介意自己係人哋心目中嘅形象，或者可以諗下你想拒絕佢嘅原因同埋呢位同事對你而言有幾重要，衡量下再決定say “YES” or “NO”。
第二招︰拖字訣
人哋拜託你做嘢，唔一定要即刻回覆，你可以停一停、諗一諗，畀自己時間諗清楚係咪真係要幫佢，你可以回答︰
• 我要睇一睇schedule，遲啲再覆你
• 我要諗一諗，之後再答你
• 我過一陣打返畀你
如果你唔回覆，漸漸地佢就會唔記得……
第三招︰有咁詳細問咁詳細
拜託人做嘢，最好就係唔使自己煩，如果拜託人仲煩過自己做，我諗大家都會情願自己做……當同事叫你幫手，你可以發揮你嘅小宇宙，用一堆問題轟炸佢︰「幾時？」、「邊度？」、「預算？」、「原因？」、「如果遇上意外點處理？」、「雨程點安排？」……有咁詳細問咁詳細，最好啲問題係佢無可能答到嘅。如果同事叫你自己決定，你可以「謙稱」自己冇經驗，怕做錯，都係要佢清晰嘅指示，再用一堆問題轟炸佢，好快佢就會消失。
第四招︰用「可能」、「或者」等唔肯定嘅字眼
如果你嘅同事真係解答咗你嘅「問題」，問你幾時可以做完畀佢，你可以用「或者」、「可能」等唔肯定嘅字眼，好肯定咁答佢你都唔肯定；如果同事都係窮追不捨，畀一個好遙遠嘅deadline畀佢，通常佢哋都會唔記得或者搵其他人幫手。
第五招︰提供其他方案
如果你唔想完全拒絕同事嘅請求，你可以提出其他方案，幫佢做另外一啲工作，一方面顯出你人性化嘅一面，另一方面你可以因應自己情況「揀」幫啲咩；但小心，分分鐘你可能要幫佢做晒兩樣嘢，咁樣就自找麻煩啦……
（《假裝熱情》劇照）
第六招︰用原則「企硬」
每個人都有底線，你都可以有，將你嘅原則清楚咁講出嚟，並「企硬」，無論同事點樣求你「破例」，都堅守自己嘅底線！呢個當然係最理想嘅情況，但如果同事用「柔情攻擊」，你都可以用同樣嘅招式回敬︰「我都好明白你嘅情況，但如果其他同事都咁樣叫我幫手，我無辦法個個都幫……」講到咁，唔係唔走呀嘛？
向同事say “NO”唔係你無情，而係每個人都有自己嘅責任，你幫得佢等於少咗時間做自己嘅份內事，咁又合理咩？適時地拒絕，既顯出你係一個有原則嘅人，同時見到你尊重自己嘅工作！
Read more: 【點止煲劇咁簡單】職場「受寵」靠什麼？《延禧》教曉我的6大生存法則