【找回工作初心】訂立目標要夠SMART：「我要實現夢想」已經out了！
#職場 #上班族 #SMART理論 #管理學 #辦公室貼士雖然大家都會話，返工志在搵啖食，好多嘢唔駛咁執著！之但係，喺呢個世界上，其實都仲有唔少為理想拚搏嘅打工仔嘅！
（《少林足球》截圖）
嗱，唔係小編亂講，真係有數字支持㗎！《世界經濟論壇》上年發布咗一份「全球傑出青年調查」，入面提到全球超過兩萬名受訪者當中，有40.6%視「工作目標／對社會帶來影響」為尋找工作嘅重要考慮因素，其中以22至26歲（35%）及27至30歲（29%）最為顯著。而呢班人正正就係初入職場，同埋仍然喺度為事業奮鬥嘅你、我、他！
曾經聽人講過：人一生，可以冇好大嘅名望，亦可以冇好多嘅財富，但一定唔可以冇工作嘅樂趣！試諗下，如果工作只係令人感到厭倦、緊張和失望，人嘅一生將會係幾咁痛苦；但如果工作能夠幫你實現自己嘅抱負或理想，就算再辛苦心裏面都係滿足嘅！所以，如果今日嘅你只係營營役役地工作，而失去咗最初步入職場嘅「方向」和「動力」，喺時候要重新起動！
（《世上沒有輕鬆的工作》截圖）
仲有一樣嘢要提醒大家！雖然有方向、有動力係好事，但訂立目標嘅時候切忌「假大空」。即係唔好再簡單講句「我要實現夢想！」、「我要幫到好多人！」、「我要成為世界首富！」就算，而要設定一啲務實嘅目標，再一步步咁實踐出嚟！
即刻等小編教大家點用「S.M.A.R.T.」嚟設定自己嘅工作目標啦！
「S.M.A.R.T.」理論其實係由管理學大師彼得·杜拉克（Peter Drucker）喺1954年提出，他建議人喺設定目標嘅時候，應該要把握下列5個原則：
1. Specific（明確嘅目標）
2. Measurable（可衡量、量化嘅數值）
3. Attainable（可達成嘅目標）
4. Relevant（和組織、策略相關嘅）
5. Time-based（有明確嘅完成期限）
即係點？就等小編舉個簡單例子嚟解釋下啦！
假設你係一個Sales，想運用「S.M.A.R.T.」理論為自己訂立今個月嘅工作目標……
1. Specific──明確嘅目標
所謂明確，就係要用具體嘅語言清楚咁說明要達成嘅標準，切忌模棱兩可！
例子：
Ο「增加陌生客戶嘅拜訪量，以提高客戶簽約量。」
Χ「我要搵多啲生客！」
（《葉問》截圖）
2. Measurable──可衡量、量化嘅數值
最重要嘅原則就是「盡可能寫出具體的數字」。就算無法寫出具體數字嘅目標，都要盡量寫到數字出嚟！
例子：
Ο「今個月要完成10個客戶的簽約。」
Χ「我會簽多幾張單！」
3. Attainable──可達成嘅目標
可實現嘅目標，即指喺遇到困難、障礙或其他不利因素嘅情況下，仍有機會可以完成，需符合自己嘅實際工作能力。其重點在於塑造一個「有啲挑戰性嘅目標」→「達成」→「激發工作幹勁」嘅良性循環。
例子：
Ο「我上個月簽咗8個客，所有係好有可能實現到『今個月簽10個客戶』嘅目標。」
Χ「我要簽到最大銀碼嘅單，做Top Sales！」
（《與神同行》截圖）
4. Relevant──和組織、策略相關嘅
畢竟呢個係工作目標嘅設定，所以一定要和職責相關，不可以跑題。
例子：
Ο「實現目標後，能夠獲得上司嘅認可，將來就可以獲得更多提升嘅機會和資源。」
Χ「學好手車，第時去旅行都方便啲呀！」
5. Time-based──有明確嘅完成期限
相信好多人都試過，把口話會做，卻好難付諸行動。所以訂立目標時，最好根據事情嘅輕重緩急，先擬定完成期限；期間亦要定期檢查下自己嘅完成進度。如果你本身係個冇乜計劃嘅人，最好就由短期目標入手，唔好一嚟就開始一個以年計嘅長期目標。
例子：
Ο「我會喺今個月底前，亦即係31號前，完成目標。」
Χ「我一定會喺我離開公司之前做到Top Sales！」