職場

　　打工仔除咗求加薪之外，另一個最關心嘅問題當然係升職啦！但唔少人都會問：「升職要靠乜？係睇運氣定睇表現？抑或……要識得擦腦細鞋？」

 

　　計小編話，上位最緊要係做好自己（仲要內外兼備）！如果唔係嘅話，就算畀你靠運氣或靠擦鞋而升到職，最後都會因為「名不符實」而被同事群起而怨之！

 

1. 責任心要有行動

 

　　責任心唔係得個講字，而要有行動！小編就最怕啲人應承咗話會做，但最後就以「手頭上有好多其他工作」、「放工之後約咗人食飯」等理由而一拖再拖，甚至話你唔體諒佢嘅難處。

 

（《蜘蛛俠》截圖）

 

2. 有主見，但不要太固執

 

　　做得話事嗰個，一定要有自己嘅思想同主見！不過而家做嘢好多時都講求團隊合作，為咗有效帶領團隊達成目標，做leader嗰個喺堅持主見嘅同時，亦都要有容人之心！

 

3. 唔好捉住別人的錯誤不放

 

　　除咗「接納意見」外，容人之心仲可以體現喺「包容錯失」上。須知道每個人都有犯錯嘅可能，作為leader嘅，固然有責任要指出下屬嘅錯，甚至予以責罰；不過鬧完、罰完、處理返件事之後，就唔好茶餘飯後再拎返件事出嚟講啦！

 

（《愛·回家之開心速遞》截圖）

 

4. 情緒穩定

 

　　返工遇到唔如意嘅事十常八九，最緊要係唔好被情緒拖住走，搞到影響晒全team嘅工作進度。尤其係要做leader嘅人，佢哋要處理嘅事會更多更難，所以學好情緒管理非常重要！

 

（《飛虎之潛行極戰》截圖）

 

5. 能激勵下屬士氣

 

　　一個人有動力，做嘢先會有好表現！做得leader，除咗要有個人目標之外，亦要識得激勵下屬。例如指派佢哋去做一啲有挑戰性、可以發揮技能嘅工作，又或者喺佢哋達到工作要求嘅時候多加讚賞，同埋鼓勵佢哋再接再勵！

 

6. 敢於突破

 

　　一個好嘅leader，係有能力帶領團隊做新事，唔係下下都沿用舊用嘅一套方法！所以趁公餘時間學多啲、學闊啲，開下自己嘅眼界，絕對係百利而無一害！

 

7. 識得感恩

 

　　識得感恩都係升職要訣？當然啦！識得感恩嘅人通常都會散發著一種喜悅和活力，人緣一定唔會差！而且喺困難面前，佢哋亦都冇咁易頹廢沮喪，仲會識得欣賞同肯定同事嘅付出，做leader一流啊！

 

（《深宮計》截圖）