職場

　　人老咗，身體機能變差，係咪就乜都做唔好？最近無綫新劇《BB來了》開播，吸引唔少觀眾追睇，更大讚女主角李佳芯完美演繹新手媽咪嘅辛酸！不過，小編反而對飾演李佳芯媽媽嘅陳秀珠印象深刻，事關佢為咗幫個女坐月坐得好，就算湊孫湊到腰酸背痛、冇覺好瞓都好，仍然一句聲唔出繼續做，仲要將提神飲品「狂牛」當水咁飲，真係夠晒狂！結果係點？當然係李佳芯知道咗之後，大鬧佢咗一餐啦！

 

 （《BB來了》劇照）

 

　　通常處理呢啲家庭糾紛，外人梗係唔方便插手啦；而作為觀眾，「聽古咪駁古」就更加係至理名句，所以誰是誰非，呢度就先撇開唔講。但小編諗到嘅係，如果有一日到我自己退休，日日坐喺屋企戆居居，想幫手湊孫但又被仔女嫌棄，應該點算好？而更大嘅問題係，係咪人老咗就等於冇晒生產力？

 

　　梗係唔係啦！

 

　　尤其近年社會有唔少聲音都話要釋放長者勞動力，鼓勵50至64歲年長人士、65至74歲嘅「少老」重投勞動市場，同年青一輩分享佢哋嘅知識、經驗，甚至人脈，繼續喺社會發熱發光。之但係，究竟有咩工啱佢哋做呢？

 

 

1. 侍應生

 

　　雖然老人家手腳可能唔夠後生仔快，不過做侍應嘅話，佢哋一定贏在夠耐性、應變能力高、人際溝通技巧好，皆因飲食業始終係一個服務行業，點樣照顧客人嘅需要先係最重要！有時客人無理取鬧，點樣有技巧地安撫到佢，而唔影響其他客人，呢個真係要有返咁上下歷練先做得到！

 

 

2. 攝影師

 

　　影相、拍片絕對冇年齡限制啦！日本熊本就有一位叫西本喜美子嘅婆婆，72歲先開始學攝影，74歲再學Mac後製，然後88歲就出版咗佢人生第一本攝影集，真係超值得大家學習！而香港亦有一間由退休人士組成嘅攝製公司「數碼先鋒」，除咗幫企業同機構拍宣傳片，仲試過跟一位本地導演拍電影添，真係咪話佢哋唔犀利！

 

西本喜美子

 

 

3. 演員

 

　　小至出生無耐嘅BB，大至70、80歲嘅老人家都可以做嘅一份工，仲唔係演員。老人家有時喺屋企睇電視睇得悶悶哋，或者都可以考慮下去片場做「臨記」喎！

 

 4. 模特兒

 

　　如果你認為老人家只可以著得平實，咁你就實在太out啦，今時今日嘅「老友記」分分鐘比你同我都著得更潮、更識襯衫之道！學電影《我要做model》裏面嘅鄭中基話齋，做model係講氣質㗎嘛，試問一班「老友記」經歷五六十年，甚至更多時間所養成嘅氣質又點會唔值得我哋欣賞？等小編話你知啦，香港其實都有間銀髮模特兒公司──「老正工作室」㗎！

 

 

 Read more: 【姍姍而來的花樣年華】我要做Model！鏡頭前綻放≥60歲的美麗

 

 

5. 搖滾歌手

 

　　Rock and Roll從來都唔單只係後生仔嘅玩意，只要對搖滾音樂有激情，就算七老八十，都一樣可以夾band做rocker！喺德國就有一個叫Wilhelm嘅爺爺，95歲（2010年）嘅時候都依然活躍搖滾界，仲成立咗一個樂團，定時定候仲會出show表演添！不過小編諗，香港應該難啲有呢件事發生。